ഇസ്ലാമാബാദ് : യുഎസ്- ഇറാൻ ചർച്ച വിഫലമായിപോയെന്ന് യുഎസ് വൈസ് പ്രസിഡണ്ട് ജെഡി വാൻസ് . 21 മണിക്കൂറിലേറെ നീണ്ടുനിന്ന ചർച്ച നടന്നു . റെഡ് ലൈൻ നിശ്ചയിച്ചെന്നും ഇറാൻ ആണവായുധം ഉണ്ടാക്കരുത് എന്നതാണ് പ്രധാനമെന്നും ജെഡി വാൻസ് പറഞ്ഞു. ഇത് യുഎസിന്റെ അവസാനത്തെ മികച്ച ഓഫർ ആണെന്നും ഇറാൻ സ്വീകരിക്കുമോ എന്നറിയാൻ കാത്തിരിക്കുകയാണെന്നും വൈസ് പ്രസിഡണ്ട് പ്രതികരിച്ചു .
ഇറാൻ ഞങ്ങളുടെ നിബന്ധനകൾ അംഗീകരിക്കില്ലെന്ന് പറഞ്ഞു. ഒരു കരാറിൽ എത്താനാണ് പ്രസിഡണ്ട് ( ഡൊണാൾഡ് ട്രംപ് ) പറഞ്ഞത് . എന്നാൽ നിർഭാഗ്യവശാൽ ഒരു പുരോഗതിയും ഉണ്ടായില്ല – ജെഡി വാൻസ് മാധ്യമങ്ങളോട് പറഞ്ഞു .
40 ദിവസത്തിലേറെയായി തുടരുന്ന യുദ്ധം ഒത്തുതീർപ്പിൽ എത്താതെ നിൽക്കുന്ന സാഹചര്യമാണ് ഇപ്പോൾ. എന്നാൽ അതിനിടെ ഇറാനും പ്രോക്സികൾക്കും എതിരെ യുദ്ധം തുടരുമെന്ന് ഇസ്രായേൽ പ്രധാനമത്രി ബെഞ്ചമിൻ നെതന്യാഹു പറഞ്ഞു .
അതേസമയം ഹോർമുസിലൂടെയുള്ള കപ്പൽ ഗതാഗതം തുറന്നു എന്നാണ് ഇസ്ലാമിക് റെവല്യൂഷനറി ഗാർഡ് കോർപസ് വിശദമാക്കിയത് . എന്നാൽ സൈനിക കപ്പലുകൾക്ക് പ്രവേശനം അനുവദിക്കില്ലെന്ന നിലപാടാണ് ഇറാൻ സ്വീകരിച്ചിരിക്കുന്നത് .
