ചണ്ഡീഗഢ് : 2027ൽ നടക്കാനിരിക്കുന്ന പഞ്ചാബ് നിയമസഭാ തിരഞ്ഞെടുപ്പിനുള്ള ആദ്യ സ്ഥാനാർഥി പട്ടിക പ്രഖ്യാപിച്ച് ആം ആദ്മി പാർട്ടി (എഎപി). 40 സ്ഥാനാർഥികളെയാണ് ആദ്യ പട്ടികയിൽ ഉൾപ്പെടുത്തിയിരിക്കുന്നത്. നിലവിലെ എംഎൽഎമാർക്ക് തന്നെ വീണ്ടും അവസരം നൽകിയാണ് പാർട്ടി പട്ടിക പുറത്തിറക്കിയത്. മുഖ്യമന്ത്രി ഭഗവന്ത് മാൻ ധുരി മണ്ഡലത്തിൽ നിന്ന് വീണ്ടും ജനവിധി തേടും. ജയിലിൽ കഴിയുന്ന എംഎൽഎ സഞ്ജീവ് അറോറയ്ക്ക് ലുധിയാന വെസ്റ്റ് മണ്ഡലത്തിലും പാർട്ടി സീറ്റ് നൽകിയിട്ടുണ്ട്.
തിരഞ്ഞെടുപ്പിന് ഏകദേശം നാല് മാസം മുമ്പ് തന്നെ സ്ഥാനാർഥികളെ പ്രഖ്യാപിച്ചതിലൂടെ മണ്ഡലങ്ങളിൽ പ്രചാരണ പ്രവർത്തനങ്ങൾക്ക് നേരത്തേ തുടക്കം കുറിക്കുകയാണ് എഎപിയുടെ ലക്ഷ്യം. ആദ്യ പട്ടികയിലെ 40 പേരും നിലവിലെ എംഎൽഎമാരാണ്. പുതിയ പരീക്ഷണങ്ങൾക്ക് മുതിരാതെ നിലവിലെ ജനപ്രതിനിധികളിൽ വിശ്വാസമർപ്പിക്കാനാണ് പാർട്ടി തീരുമാനിച്ചിരിക്കുന്നത്.
ഭഗവന്ത് മാനെ കൂടാതെ ഡോ. ഇന്ദർബീർ സിങ് നിജ്ജർ അമൃത്സർ സൗത്തിൽ നിന്നും കുൽദീപ് സിങ് ധാലിവാൾ അജ്‌നാലയിൽ നിന്നും മത്സരിക്കും. ബൽക്കർ സിങ് കർത്താർപൂരിലും അജിത്‌പാൽ സിങ് കോഹ്‌ലി പട്യാലയിലും ജനവിധി തേടും.
വ്യവസായ നഗരമായ ലുധിയാനയിലെ അഞ്ച് നിയമസഭാ മണ്ഡലങ്ങളിലേക്കുമുള്ള സ്ഥാനാർഥികളെയും എഎപി പ്രഖ്യാപിച്ചിട്ടുണ്ട്. ലുധിയാന ഈസ്റ്റിൽ ദൽജിത് സിങ് ഗ്രേവാൾ (ഭോല), ആത്മ് നഗറിൽ കുൽവന്ത് സിങ് സിദ്ധു, ലുധിയാന സെൻട്രലിൽ അശോക് പരാശർ (പപ്പി), ലുധിയാന വെസ്റ്റിൽ സഞ്ജീവ് അറോറ, ലുധിയാന നോർത്തിൽ മദൻ ലാൽ ബഗ്ഗ എന്നിവരാണ് മത്സരിക്കുക.
മറ്റ് മണ്ഡലങ്ങളിൽ അമൻദീപ് കൗർ അറോറ മോഗയിലും ജഗ്ദീപ് കാംബോജ് (ഗോൾഡി) ജലാലാബാദിലും നരീന്ദർപാൽ സിങ് ഫാസിൽക്കയിലും ജഗ്ദീപ് സിങ് കാക്ക ബ്രാർ മുക്ത്സറിലും മത്സരിക്കും. കോട്ട്‌കാപുരയിൽ കുൽത്താർ സിങ് സന്ധ്വാനും തൽവണ്ടി സാബോയിൽ ബൽജീന്ദർ കൗറുമാണ് സ്ഥാനാർഥികൾ.
ഹോഷിയാർപൂർ ജില്ലയിലും നാല് മണ്ഡലങ്ങളിലെ സ്ഥാനാർഥികളെ പ്രഖ്യാപിച്ചിട്ടുണ്ട്. ഹോഷിയാർപൂരിൽ ബ്രഹം ശങ്കർ ജിംപ, ചബ്ബേവാളിൽ ഇഷാങ്ക് കുമാർ ചബ്ബേവാൾ, ഗഢ്ശങ്കറിൽ ജയ് കൃഷ്ണ സിങ് റൗരി, ദസൂയയിൽ കരംബീർ സിങ് ഘുമാൻ എന്നിവരാണ് എഎപി സ്ഥാനാർഥികൾ. റിയൽ എസ്റ്റേറ്റ് മേഖലയിലെ പ്രമുഖനായ കുൽവന്ത് സിങ്ങിന് മൊഹാലിയിൽ വീണ്ടും പാർട്ടി ടിക്കറ്റ് നൽകിയിട്ടുണ്ട്.
നിലവിലെ എംഎൽഎമാരെ തന്നെ ഉൾപ്പെടുത്തി ആദ്യ പട്ടിക പ്രഖ്യാപിച്ചതിലൂടെ പഞ്ചാബിൽ ഭരണത്തുടർച്ച ലക്ഷ്യമിട്ടുള്ള തിരഞ്ഞെടുപ്പ് പ്രവർത്തനങ്ങൾക്ക് നേരത്തേ തുടക്കം കുറിക്കുകയാണ് ആം ആദ്മി പാർട്ടി.
