ഡൽഹി: ഷാരൂഖ് ഖാന്റെ പുതിയ ചിത്രമായ ‘കിങ്’ റിലീസിന് മുൻപേ വിവാദത്തിൽ. ചിത്രത്തിലെ ദീപിക പദുക്കോണിന്റെ കാവി നിറത്തിലുള്ള വസ്ത്രമാണ് ഇപ്പോൾ ചർച്ചയാകുന്നത്. ഈ രംഗം കാവി നിറത്തെ അപമാനിക്കുന്നതാണെന്ന് ആരോപിച്ച് ബിജെപി എംഎൽഎ രവി നേഗി രംഗത്തെത്തി. ഈ രംഗം സിനിമയിൽ നിന്ന് നീക്കം ചെയ്യണമെന്നും അല്ലാത്തപക്ഷം ചിത്രം ബഹിഷ്‌കരിക്കുമെന്നും അദ്ദേഹം മുന്നറിയിപ്പ് നൽകി. നേരത്തെ ‘പത്താൻ’ സിനിമയിലെ ദീപികയുടെ ഓറഞ്ച് ബിക്കിനി രംഗവും വലിയ വിവാദമായിരുന്നു.
ഇപ്പോൾ വീണ്ടും സമാനമായ വിവാദം ഉയർന്നതോടെ സിനിമാ ലോകത്ത് ചർച്ചകൾ സജീവമാണ്. അതേസമയം, ‘കിങ്’ സിനിമയിലെ ‘തു മിൽ ജായേ’ എന്ന ഗാനം പുറത്തിറങ്ങിയ ആദ്യ ദിവസം തന്നെ ആറ് കോടിയിലധികം കാഴ്ചകൾ നേടി. സോഷ്യൽ മീഡിയയിലും വിഷയത്തിൽ വലിയ ചർച്ചയാണ് നടക്കുന്നത്. ചിലർ ബിജെപി നേതാവിനെ പിന്തുണയ്ക്കുമ്പോൾ മറ്റു ചിലർ വിമർശനവുമായി രംഗത്തെത്തിയിട്ടുണ്ട്. സിനിമയുടെ അണിയറപ്രവർത്തകർ ഇതുവരെ പ്രതികരിച്ചിട്ടില്ല. ഈ വിവാദം ചിത്രത്തിന്റെ പ്രചാരണത്തിന് കൂടുതൽ ശ്രദ്ധ നേടിക്കൊടുക്കുമെന്നാണ് വിലയിരുത്തൽ. ഷാരൂഖ് ഖാൻ ഈ ആവശ്യത്തോട് എങ്ങനെ പ്രതികരിക്കുമെന്നാണ് ആരാധകർ ഉറ്റുനോക്കുന്നത്.
