തിരുവനന്തപുരം: തിരുവനന്തപുരം ശ്രീകാര്യത്തെ അഭിറാമിന്റെ കൊലപാതകത്തിൽ ഞെട്ടിക്കുന്ന വിവരങ്ങൾ പുറത്ത്! കൊലപാതകത്തിൽ രണ്ടാം പ്രതിയായ ഉമറിനും പങ്കുണ്ടെന്നാണ് അന്വേഷണസംഘത്തിന്റെ കണ്ടെത്തൽ. ഒന്നാം പ്രതിയായ 17കാരനെ കുറ്റപ്പെടുത്തി ഉമർ കാമുകിക്ക് തുടർച്ചയായി സന്ദേശങ്ങൾ അയച്ചതായും റിപ്പോർട്ടുകളുണ്ട്.
കൊലപാതകം നടന്ന സമയത്ത് വീട്ടിലുണ്ടെന്ന് വരുത്തിത്തീർക്കാൻ വീട്ടിലെ സിസിടിവി ക്യാമറകൾക്ക് മുന്നിലൂടെ മനഃപൂർവം നടന്നതായും പൊലീസ് സംശയിക്കുന്നു. സ്വന്തം ഫോൺ വീട്ടിൽ ഉപേക്ഷിച്ച ശേഷമാണ് ഇയാൾ സംഭവസ്ഥലത്തെത്തിയതെന്നാണ് അന്വേഷണത്തിലെ കണ്ടെത്തൽ. അഭിറാമിന്റെ മൊബൈൽ ഫോൺ, ഷൂസ്, കൊലപാതകത്തിന് ഉപയോഗിച്ച ബെൽറ്റ് എന്നിവ ഇതുവരെ കണ്ടെത്താനായിട്ടില്ല. തെളിവുകൾ നശിപ്പിക്കാൻ പ്രതികൾ നേരത്തെ ആസൂത്രണം നടത്തിയെന്നാണ് പൊലീസിന്റെ നിഗമനം.
അതേസമയം, ഒന്നാം പ്രതിയായ 17കാരനെ കസ്റ്റഡിയിൽ വാങ്ങി കൂടുതൽ ചോദ്യം ചെയ്യാനാണ് പൊലീസിന്റെ നീക്കം. കേസിൽ കൂടുതൽ നിർണായക വിവരങ്ങൾ പുറത്തുവരുമെന്ന പ്രതീക്ഷയിലാണ് അന്വേഷണസംഘം. അഭിറാമിന്റെ ഫോൺ അവസാനമായി മൺവിള ഭാഗത്താണ് ടവർ ലൊക്കേഷൻ കാണിച്ചതെന്നും റിപ്പോർട്ടുകളുണ്ട്. അതിനാൽ ആ പ്രദേശത്ത് വിശദമായ പരിശോധന നടത്താനും പൊലീസ് തീരുമാനിച്ചിട്ടുണ്ട്. കേസിലെ ദുരൂഹതകൾ നീങ്ങാൻ ഇനി 17കാരന്റെ മൊഴി നിർണായകമാകുമെന്നാണ് വിലയിരുത്തൽ.
അതേസമയം, ചോദ്യം ചെയ്യലിനോട് ഉമർ ഇതുവരെ സഹകരിച്ചിട്ടില്ലെന്നാണ് റിപ്പോർട്ടുകൾ. തനിക്ക് കൊലപാതകത്തിൽ പങ്കില്ലെന്ന നിലപാടിൽ ഉറച്ചുനിൽക്കുകയാണ് ഇയാൾ. കാണാതായ തെളിവുകൾ കണ്ടെത്താനുള്ള പൊലീസിന്റെ തുടർനടപടികൾ കേസിൽ നിർണായകമാകും. സംഭവത്തിന്റെ കൂടുതൽ വിവരങ്ങൾക്കായി കാത്തിരിക്കുകയാണ് നാട്ടുകാരും
