മൻസ: പഞ്ചാബിൽ ലഹരിമരുന്ന് വ്യാപനത്തിനെതിരെ പ്രവർത്തിച്ചിരുന്ന കൊല്ലപ്പെട്ട സാമൂഹിക പ്രവർത്തകൻ പർവീന്ദർ സിങ് ഝോട്ടയുടെ മൃതദേഹം അന്ത്യകർമങ്ങൾക്കായി ജന്മനാടായ മൻസയിലെത്തിച്ചു. ചണ്ഡീഗഢിലെ പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷമാണ് ഞായറാഴ്ച മൃതദേഹം മൻസയിലെത്തിച്ചത്. തുടർന്ന് ചക്കേറിയൻ റോഡിലെ കുടുംബത്തിന്റെ കൃഷിയിടത്തിൽ സംസ്കാരച്ചടങ്ങുകൾ നടത്തി.
കഴിഞ്ഞ മാസം 13നാണ് മൻസയിലെ തിരക്കേറിയ മാർക്കറ്റിലുള്ള മെഡിക്കൽ സ്റ്റോറിൽ വെച്ച് ഝോട്ട വെടിയേറ്റ് കൊല്ലപ്പെട്ടത്. പ്രായമായ ഒരാൾക്ക് ലഹരിക്ക് ഉപയോഗിക്കുന്ന മരുന്നുകൾ വിൽക്കുന്നതിനെ ചോദ്യം ചെയ്യുന്നതിനിടെ കടയുടമ വെടിയുതിർക്കുകയായിരുന്നുവെന്നാണ് റിപ്പോർട്ടുകൾ. സംഭവസമയത്ത് ഝോട്ട ഫേസ്ബുക്ക് ലൈവിലായിരുന്നു. കേസിൽ കടയുടമയെ പിന്നീട് പൊലീസ് അറസ്റ്റ് ചെയ്തു.
ഝോട്ടയുടെ മൃതദേഹം മൻസയിലെ സിവിൽ ആശുപത്രി മോർച്ചറിയിൽ മൂന്നാഴ്ചയിലേറെയായി സൂക്ഷിച്ചിരിക്കുകയായിരുന്നു. പോസ്റ്റ്‌മോർട്ടം നടത്തണമെന്ന കുടുംബത്തിന്റെ ആവശ്യം ഉൾപ്പെടെയുള്ള വിഷയങ്ങളിൽ തർക്കം നിലനിന്നതിനെ തുടർന്ന് കുടുംബവും വിവിധ സംഘടനകളും ചേർന്ന് 22 ദിവസത്തോളം പ്രതിഷേധം നടത്തി. നവംബർ നാലിന് പഞ്ചാബ് സർക്കാർ പ്രതിനിധികളുമായി നടത്തിയ ചർച്ചയ്ക്കൊടുവിലാണ് പോസ്റ്റ്‌മോർട്ടത്തിന് കുടുംബം സമ്മതിച്ചത്. തുടർന്ന് മൃതദേഹം ചണ്ഡീഗഢിലെ PGIMER ആശുപത്രിയിലേക്ക് മാറ്റി.
ഝോട്ടയുടെ കൊലപാതകം പഞ്ചാബിൽ വലിയ രാഷ്ട്രീയ വിവാദത്തിനും പ്രതിഷേധങ്ങൾക്കും വഴിവെച്ചിരുന്നു. സംസ്ഥാനത്തെ ലഹരിമരുന്ന് വ്യാപനവും ക്രമസമാധാന നിലയും ചൂണ്ടിക്കാട്ടി പ്രതിപക്ഷം ഭഗവന്ത് മൻ സർക്കാരിനെതിരെ വിമർശനം ശക്തമാക്കി. സംഭവത്തിൽ സിബിഐ അന്വേഷണം വേണമെന്ന കുടുംബത്തിന്റെ ആവശ്യത്തെ തുടർന്ന് കേസ് അന്വേഷണം സിബിഐക്ക് കൈമാറിയിരുന്നു.
പ്രതിഷേധത്തിനിടെ അറസ്റ്റിലായ ആക്ഷൻ കമ്മിറ്റി അംഗങ്ങളെ വിട്ടയക്കുക, കുടുംബത്തിന് നഷ്ടപരിഹാരം നൽകുക, ഝോട്ടയുടെ ഭാര്യയ്ക്ക് സർക്കാർ ജോലി നൽകുക തുടങ്ങിയ ആവശ്യങ്ങളിൽ സർക്കാർ ഉറപ്പുനൽകിയതായും റിപ്പോർട്ടുകളുണ്ട്. ഝോട്ടയുടെ പേരിൽ ട്രോമാ സെന്റർ സ്ഥാപിക്കുക, സ്മാരകം ഒരുക്കുക തുടങ്ങിയ ആവശ്യങ്ങളും അംഗീകരിച്ചതായാണ് വിവരം.
മകന്റെ സംസ്കാരച്ചടങ്ങിനോടനുബന്ധിച്ച് പഞ്ചാബിലെ യുവാക്കൾ ലഹരിയിൽ നിന്ന് വിട്ടുനിൽക്കണമെന്ന് പിതാവ് ഭീം സിങ് അഭ്യർത്ഥിച്ചു. ലഹരിക്കെതിരായ പോരാട്ടം തുടരുമെന്ന സന്ദേശത്തോടെയാണ് കുടുംബവും പ്രവർത്തകരും ഝോട്ടയ്ക്ക് അന്ത്യാഞ്ജലി അർപ്പിച്ചത്.
