ഗാങ്‌ടോക്ക്: സിക്കിമിലെ ഷെരത്താങ് യുദ്ധസ്മാരകത്തിലെത്തി വീരമൃത്യു വരിച്ച സൈനികർക്ക് ആദരമർപ്പിച്ച് പ്രതിരോധമന്ത്രി രാജ്നാഥ് സിങ്. ദീപാവലി ദിനത്തിൽ നാഥുലാ അതിർത്തിക്ക് സമീപമുള്ള സൈനിക ക്യാമ്പുകളിലെത്തിയ അദ്ദേഹം സൈനികർക്കൊപ്പം ആഘോഷങ്ങളിലും പങ്കുചേർന്നു.
കിഴക്കൻ സിക്കിമിലെ ഷെരത്താങ് യുദ്ധസ്മാരകത്തിൽ പുഷ്പാർച്ചന നടത്തിയാണ് രാജ്നാഥ് സിങ് രാജ്യത്തിനായി ജീവൻ ബലിയർപ്പിച്ച സൈനികരെ അനുസ്മരിച്ചത്. രാജ്യത്തിന്റെ പരമാധികാരവും അഖണ്ഡതയും സംരക്ഷിക്കുന്നതിൽ സൈനികർ വഹിച്ച പങ്കിനെയും അവരുടെ ധീരതയെയും അദ്ദേഹം പ്രകീർത്തിച്ചു.
തുടർന്ന് അതിർത്തി മേഖലയിൽ വിന്യസിച്ചിരിക്കുന്ന ത്രിശക്തി കോർപ്സിലെ സൈനികരുമായി അദ്ദേഹം സംവദിച്ചു. പ്രതികൂല കാലാവസ്ഥയിലും ഉയർന്ന പ്രദേശങ്ങളിലെ പ്രയാസകരമായ സാഹചര്യങ്ങളിലും രാജ്യത്തിന്റെ അതിർത്തികൾ കാത്തുസൂക്ഷിക്കുന്ന സൈനികരുടെ അർപ്പണബോധത്തെയും ഉയർന്ന മനോവീര്യത്തെയും അദ്ദേഹം അഭിനന്ദിച്ചു.
ദീപാവലിയുടെ വെളിച്ചം രാജ്യത്തെ ഓരോ വീടുകളിലും എത്തിക്കാൻ അതിർത്തിയിൽ സൈനികർ കാവൽ നിൽക്കുകയാണെന്നും അവർ രാജ്യത്തിന്റെ സുരക്ഷയുടെ വെളിച്ചമാണെന്നും രാജ്നാഥ് സിങ് പറഞ്ഞു. കുടുംബങ്ങളിൽനിന്ന് അകന്ന് രാജ്യസേവനത്തിനായി ജീവിതം സമർപ്പിക്കുന്ന സൈനികരുടെ ത്യാഗത്തെയും അദ്ദേഹം ഓർമിച്ചു.
സന്ദർശനത്തിന്റെ ഭാഗമായി ബാബാ ഹർഭജൻ സിങ് സ്മാരകത്തിലും രാജ്നാഥ് സിങ് ആദരമർപ്പിച്ചു. കരസേനാ മേധാവി ജനറൽ ധീരജ് സേത്ത് ഉൾപ്പെടെയുള്ള മുതിർന്ന സൈനിക ഉദ്യോഗസ്ഥരും അദ്ദേഹത്തോടൊപ്പമുണ്ടായിരുന്നു.
1967ലെ നാഥുലാ, ചോ ലാ ഏറ്റുമുട്ടലുകളിലും സ്വാതന്ത്ര്യാനന്തര കാലത്തെ മറ്റ് സംഘർഷങ്ങളിലും വീരമൃത്യു വരിച്ച സൈനികരുടെ ഓർമയ്ക്കായി 2008ലാണ് ഷെരത്താങ് യുദ്ധസ്മാരകം സ്ഥാപിച്ചത്.
