ഡെറാഡൂൺ: ഉത്തരാഖണ്ഡിലെ ഉത്തരകാശിയിൽ ഹിമപാതത്തെ തുടർന്ന് കാണാതായ എട്ട് ട്രെക്കർമാരിൽ രണ്ടുപേരുടെ മൃതദേഹങ്ങൾ കണ്ടെത്തി. ഒക്ടോബർ 29ന് കേദാർതാൽ ട്രെക്കിങ് പാതയിലുണ്ടായ വൻ ഹിമപാതത്തിലാണ് സംഘം അപകടത്തിൽപ്പെട്ടത്. ഒരു പുരുഷന്റെയും ഒരു സ്ത്രീയുടെയും മൃതദേഹങ്ങളാണ് ചൊവ്വാഴ്ച രക്ഷാപ്രവർത്തകർ കണ്ടെത്തിയത്. ഇരുവരെയും തിരിച്ചറിഞ്ഞിട്ടില്ല.
കേദാർ ഖരകിന് സമീപം നടത്തിയ തിരച്ചിലിനിടെ സംസ്ഥാന ദുരന്തനിവാരണ സേനയും നെഹ്‌റു ഇൻസ്റ്റിറ്റ്യൂട്ട് ഓഫ് മൗണ്ടനീയറിങ്ങും സംയുക്തമായാണ് മൃതദേഹങ്ങൾ കണ്ടെത്തിയത്. തിരച്ചിലിനിടെ ട്രെക്കർമാരുടെ ടെന്റുകളും ഉപകരണങ്ങൾ അടങ്ങിയ ബാഗുകളും ലഭിച്ചതായി അധികൃതർ അറിയിച്ചു.
ഏകദേശം 4,000 മീറ്റർ ഉയരത്തിലുള്ള കേദാർ ഖരകിലാണ് നിലവിൽ രക്ഷാപ്രവർത്തനം കേന്ദ്രീകരിച്ചിരിക്കുന്നത്. ചൊവ്വാഴ്ച ഉച്ചയ്ക്ക് മൂന്നുമണിയോടെ അന്നത്തെ തിരച്ചിൽ അവസാനിപ്പിച്ച് സംഘം ബേസ് ക്യാമ്പിലേക്ക് മടങ്ങി. ബുധനാഴ്ച തിരച്ചിൽ പുനരാരംഭിക്കും. രക്ഷാപ്രവർത്തനം സുഗമമാക്കാൻ അപകടസ്ഥലത്തിന് സമീപം പുതിയ ഹെലിപ്പാഡും ഒരുക്കിയിട്ടുണ്ട്.
പശ്ചിമ ബംഗാളിൽ നിന്നുള്ള അഞ്ച് പുരുഷ ട്രെക്കർമാരും ഉത്തർപ്രദേശിൽ നിന്നുള്ള രണ്ട് വനിതാ ട്രെക്കർമാരും ഉത്തരകാശി സ്വദേശിയായ ഗൈഡുമാണ് കാണാതായ എട്ടുപേർ. ഗംഗോത്രിയിൽ നിന്ന് ഒക്ടോബർ 27ന് പുറപ്പെട്ട 12 അംഗ സംഘത്തിൽ ഏഴ് ട്രെക്കർമാരും അഞ്ച് സഹായികളും ഉൾപ്പെട്ടിരുന്നു. ഹിമപാതത്തെ തുടർന്ന് എട്ട് പേരുമായുള്ള ബന്ധം നഷ്ടപ്പെട്ടതോടെ നാല് സഹായികൾ ഒക്ടോബർ 30ന് ഗംഗോത്രിയിൽ തിരിച്ചെത്തിയാണ് വിവരം അറിയിച്ചത്.
മോശം കാലാവസ്ഥ രക്ഷാപ്രവർത്തനത്തിന് തടസ്സമാകുന്നുണ്ടെന്ന് എസ്ഡിആർഎഫ് അധികൃതർ അറിയിച്ചു. കാണാതായ മറ്റ് ആറുപേർക്കായുള്ള തിരച്ചിൽ തുടരുകയാണ്.
