ന്യൂഡൽഹി: രാജ്യത്തെ ജനങ്ങൾക്ക് ദീപാവലി ആശംസകൾ നേർന്ന് പ്രധാനമന്ത്രി നരേന്ദ്ര മോദി. തിന്മയ്ക്ക് മേൽ നന്മയുടെയും ഇരുട്ടിന് മേൽ വെളിച്ചത്തിന്റെയും പ്രതീക്ഷയുടെയും വിജയമാണ് ദീപാവലി ആഘോഷമെന്ന് പ്രധാനമന്ത്രി സന്ദേശത്തിൽ പറഞ്ഞു. രാജ്യത്തെ ഓരോ വീടുകളിലും സന്തോഷവും സമാധാനവും ഐക്യവും സമൃദ്ധിയും നിറയട്ടെയെന്നും അദ്ദേഹം ആശംസിച്ചു.
ഇന്ത്യയുടെ സമ്പന്നമായ പാരമ്പര്യങ്ങൾ ആഘോഷിക്കാനും പരസ്പരമുള്ള ഐക്യവും ഒരുമയും ശക്തിപ്പെടുത്താനുമുള്ള അവസരമാണ് ദീപാവലിയെന്ന് മോദി വ്യക്തമാക്കി. ഉത്സവകാലം എല്ലാവരിലും കാരുണ്യവും പോസിറ്റീവ് ചിന്തകളും വളർത്തട്ടെയെന്നും അദ്ദേഹം പറഞ്ഞു.
പുതിയ ഊർജത്തോടെയും ദൃഢനിശ്ചയത്തോടെയും മുന്നോട്ടുപോയി സമൃദ്ധവും വികസിതവുമായ ഭാരതം കെട്ടിപ്പടുക്കാൻ എല്ലാവരും പങ്കാളികളാകണമെന്നും പ്രധാനമന്ത്രി ആഹ്വാനം ചെയ്തു. രാജ്യത്തെ ജനങ്ങൾക്ക് വീണ്ടും ദീപാവലി ആശംസകൾ നേർന്നുകൊണ്ടാണ് സന്ദേശം അവസാനിപ്പിച്ചത്.
