ഡൽഹി : മോദി സർക്കാരിന്റെ 12 വർഷത്തെ ഭരണത്തിനെതിരെ രൂക്ഷ വിമർശനവുമായി കോൺഗ്രസ് മുൻ അധ്യക്ഷ സോണിയ ഗാന്ധി. ഇന്ത്യൻ ജനാധിപത്യത്തിനും ഭരണഘടനാ സ്ഥാപനങ്ങൾക്കും ബിജെപി ഭരണകാലത്ത് വലിയ ക്ഷതമുണ്ടായെന്നാണ് സോണിയയുടെ ആരോപണം. എന്നാൽ ഈ വിമർശനത്തിന് മറുപടിയുമായി ബിജെപി രംഗത്തെത്തിയതോടെ രാഷ്ട്രീയ പോര് പുതിയ തലത്തിലേക്ക് കടന്നിരിക്കുകയാണ്.
തന്റെ ഓർമ്മക്കുറിപ്പുകളായ ‘ബിലോങ്ങിങ്: എ ജേർണി ഓഫ് ലവ്’ പുറത്തിറങ്ങുന്നതിന് മുന്നോടിയായി ‘ദി ഹിന്ദു’വിന് നൽകിയ അഭിമുഖത്തിലായിരുന്നു സോണിയയുടെ പ്രതികരണം. കേന്ദ്രത്തിൽ ഭരണമാറ്റമുണ്ടായാൽ പോലും ജനാധിപത്യ സ്ഥാപനങ്ങളെ പഴയ നിലയിലേക്ക് തിരിച്ചുകൊണ്ടുവരുന്നത് എളുപ്പമാകില്ലെന്നും അവർ അഭിപ്രായപ്പെട്ടു.
2004ൽ പ്രധാനമന്ത്രി പദം നിരസിച്ച തീരുമാനത്തെക്കുറിച്ചും സോണിയ അഭിമുഖത്തിൽ സംസാരിച്ചു. അന്ന് ആ തീരുമാനമെടുക്കാൻ രണ്ടാമതൊന്ന് ആലോചിക്കേണ്ടി വന്നില്ലെന്നാണ് അവരുടെ വെളിപ്പെടുത്തൽ. മുൻ പ്രധാനമന്ത്രി മൻമോഹൻ സിങ്ങുമായി മികച്ച രീതിയിൽ പ്രവർത്തിക്കാൻ കഴിഞ്ഞതായും സോണിയ വ്യക്തമാക്കി.
വിദേശജന്മത്തിന്റെ പേരിൽ രാഷ്ട്രീയ എതിരാളികൾ നടത്തിയ വിമർശനങ്ങൾ തന്നെ ഏറെ വേദനിപ്പിച്ചിരുന്നുവെന്നും അവർ തുറന്നുപറഞ്ഞു.
എന്നാൽ സോണിയയുടെ പരാമർശങ്ങൾക്കെതിരെ ബിജെപി നേതാക്കൾ ശക്തമായ പ്രതികരണവുമായി രംഗത്തെത്തി. 1975ലെ അടിയന്തരാവസ്ഥ പ്രഖ്യാപിച്ച കോൺഗ്രസാണ് ഇപ്പോൾ ജനാധിപത്യത്തെക്കുറിച്ച് സംസാരിക്കുന്നതെന്ന് കേന്ദ്രമന്ത്രി ഗിരിരാജ് സിങ് വിമർശിച്ചു. അടിയന്തരാവസ്ഥക്കാലത്ത് നടന്ന കാര്യങ്ങൾ സോണിയ മറന്നുപോയോ എന്നായിരുന്നു കേന്ദ്രമന്ത്രി അർജുൻ റാം മേഘ്‌വാളിന്റെ പരിഹാസം.
അതേസമയം, മോദി അധികാരത്തിലെത്തിയ ശേഷമാണ് ഇന്ത്യയെ ലോകം ജനാധിപത്യത്തിന്റെ മാതാവായി വിശേഷിപ്പിക്കാൻ തുടങ്ങിയതെന്നും ബിജെപി നേതാക്കൾ അവകാശപ്പെട്ടു.
ഇതിനിടെ സോണിയ ഗാന്ധിയുടെ ഓർമ്മക്കുറിപ്പുകൾ നവംബർ 10ന് പുറത്തിറങ്ങാനിരിക്കുകയാണ്. ‘ബിലോങ്ങിങ്: എ ജേർണി ഓഫ് ലവ്’ എന്ന് പേരിട്ടിരിക്കുന്ന പുസ്തകം ഹാർപ്പർ കോളിൻസാണ് പ്രസിദ്ധീകരിക്കുന്നത്.
മോദി സർക്കാരിന്റെ ഭരണത്തെക്കുറിച്ചുള്ള സോണിയയുടെ വിമർശനവും അടിയന്തരാവസ്ഥ ഉയർത്തിയുള്ള ബിജെപിയുടെ മറുപടിയും വീണ്ടും കോൺഗ്രസ്-ബിജെപി രാഷ്ട്രീയ പോരിന് വഴിയൊരുക്കുകയാണ്. പുസ്തകത്തിലൂടെ സോണിയയുടെ കൂടുതൽ വെളിപ്പെടുത്തലുകൾ പുറത്തുവരുമോ എന്നതും രാഷ്ട്രീയ വൃത്തങ്ങൾ ഉറ്റുനോക്കുന്നു.
