2025-ൽ ബഹ്റൈന്റെ സാമ്പത്തിക ഭൂപടം വിപ്ലവകരമായ മാറ്റത്തിന് സാക്ഷ്യം വഹിച്ചതായി റിപ്പോർട്ടുകൾ. രാജ്യത്തിന്റെ യഥാർത്ഥ ജിഡിപിയുടെ ഏകദേശം 85.8 ശതമാനവും എണ്ണ ഇതര പ്രവർത്തനങ്ങളിൽ നിന്നാണ് സംഭാവന ചെയ്യപ്പെട്ടതെന്ന് ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി എക്സിക്യൂട്ടീവ് കമ്മിറ്റി അംഗം ബോബ് താക്കർ ചൂണ്ടിക്കാട്ടി. ധനകാര്യ, ദേശീയ സാമ്പത്തിക മന്ത്രാലയം പുറത്തിറക്കിയ റിപ്പോർട്ടുകൾ ഉദ്ധരിച്ചുകൊണ്ട്, സാമ്പത്തിക വളർച്ചയിൽ സ്വകാര്യ മേഖല വഹിക്കുന്ന നിർണ്ണായക പങ്കിനെ അദ്ദേഹം അഭിനന്ദിച്ചു.
ബഹ്റൈനിലെ കമ്പനികളുടെ വിജയം ഇനി കേവലം പ്രാദേശിക വിപണിയെ മാത്രം ആശ്രയിച്ചായിരിക്കില്ലെന്ന് താക്കർ വ്യക്തമാക്കി. സുസ്ഥിരമായ വളർച്ച ഉറപ്പാക്കാൻ പ്രാദേശിക വിപണിക്ക് പുറത്ത് സാന്നിധ്യം ശക്തിപ്പെടുത്തേണ്ടത് അത്യാവശ്യമാണ്. വരുമാന സ്രോതസ്സുകൾ വൈവിധ്യവത്കരിക്കാനും അന്താരാഷ്ട്ര തലത്തിൽ ലഭ്യമായ പുതിയ വ്യാപാര-നിക്ഷേപ അവസരങ്ങൾ മുതലെടുക്കാനുമുള്ള കമ്പനികളുടെ കഴിവാണ് വരുംകാലങ്ങളിൽ അവയുടെ നിലനിൽപ്പ് നിശ്ചയിക്കുന്നത്.
