കോഴിക്കോട്: കോഴിക്കോട് ജില്ലയില് വീണ്ടും മലേറിയ സ്ഥിരീകരിച്ചു. വളയത്ത് അതിഥി തൊഴിലാളിക്കാണ് രോഗം സ്ഥിരീകരിച്ചത്. വളയം ടൗണ് ഉള്പ്പെടുന്ന വാര്ഡ് 14 ലാണ് യുപി സ്വദേശിക്ക് രോഗബാധ കണ്ടെത്തിയത്. കഴിഞ്ഞ ദിവസമാണ് ഇയാള് നാട്ടില് നിന്ന് വളയത്ത് എത്തിയത്. ശക്തമായ പനിയെ തുടര്ന്ന് വളയം ആശുപത്രിയില് ചികില്സ തേടുകയായിരുന്നു. തുടര്ന്ന് നടത്തിയ പരിശോധനയിലാണ് മലേറിയ സ്ഥിരീകരിച്ചത്. കോഴിക്കോട് ജില്ലയില് നേരത്തെ അതിഥി തൊഴിലാളി ഉള്പ്പടെയുള്ളവര്ക്ക് മലേറിയ സ്ഥിരീകരിച്ചിരുന്നു.
മനുഷ്യരിലും മൃഗങ്ങളിലും കൊതുക് പരത്തുന്ന ഒരു സാംക്രമിക രോഗമാണ് മലമ്പനി അഥവാ മലേറിയ. ഏകകോശ ജീവികള് ഉള്ക്കൊള്ളുന്ന ഫൈലം പ്രോട്ടോസോവ വിഭാഗത്തില്, പ്ലാസ്മോഡിയം ജനുസ്സില് പെട്ട പരാദങ്ങളാണ് ഈ രോഗമുണ്ടാക്കുന്നത്. മനുഷ്യനിലേക്ക് രോഗം പകരുന്നത് അനോഫിലിസ് ഇനത്തില്പെട്ട പെണ്കൊതുകിലൂടെയാണ്. മലേറിയയുടെ ആദ്യ ലക്ഷണങ്ങള് മറ്റ് പകര്ച്ചപ്പനികളോട് സാമ്യമുള്ളവയാണ് എന്നതുകൊണ്ട് രോഗനിര്ണയവും ചികിത്സയും വൈകാം. വൈറല് പനി, ഡെങ്കിപ്പനി, ഫ്ളൂ എന്നിവയ്ക്ക് ഉണ്ടാകുന്നതുപോലെ ശക്തമായ പനിയും തലവേദനയും ശരീരവേദനയും ആണ് ആദ്യലക്ഷണങ്ങള്.
