48 മണിക്കൂറിനുള്ളിൽ ലഭിച്ചത് 10,000 അപേക്ഷകൾ; ഹിറ്റായി ‘എ ദുബൈ ഇൻവൈറ്റ്

ദുബൈ: ദുബൈയിലേക്ക്​ സുഹൃത്തുക്കളെയോ ബന്ധുക്കളെയോ കൊണ്ടുവരുന്നവർക്കായി ദുബൈ സർക്കാർ പ്രഖ്യാപിച്ച സമ്മാന പദ്ധതിക്ക്​ വൻ സ്വീകരണം. നിലവിൽ ആദ്യ 48 മണിക്കൂറിനുള്ളിൽ തന്നെ അപേക്ഷകരുടെ എണ്ണം 10,000 കടന്നു. ‘എ ദുബൈ ഇൻവൈറ്റ്​’ എന്ന പേരിലുള്ള പദ്ധതിയിലൂടെ 3000 ദിർഹം വരെയുള്ള സമ്മാന കൂപ്പണുകളാണ്​ നൽകുക. സ്വദേശികൾക്കും എമിറേറ്റ്​സ്​ ഐ.ഡിയുള്ള പ്രവാസികൾക്കും ഒരുപോലെ പ​ങ്കെടുക്കാവുന്ന പദ്ധതി ജൂലൈ 20നാണ്​ തുടങ്ങിയത്​.ഒരു വർഷത്തോളം നീണ്ട തയാറെടുപ്പുകൾക്കും പഠനങ്ങൾക്കും ശേഷമാണ്​ ദുബൈ സാമ്പത്തിക-ടൂറിസം വകുപ്പ്​​ വ്യത്യസ്തമായ സമ്മാന പദ്ധതി പ്രഖ്യാപിച്ചത്​. സന്ദർശക, ഓൺ അറൈവൽ വിസകളിൽ ബന്ധുക്കളെയും സുഹൃത്തുക്കളെയും കൊണ്ടുവരുന്നവർക്കാണ്​ സമ്മാനം ലഭിക്കുക​. ആഗസ്റ്റ്​ മുതൽ റിവാർഡുകൾ ഇ-മെയിൽ വഴി ലഭ്യമാകും. ഒക്​​ടോബർ 31 വരെ ദുബൈയിൽ എത്തുന്നവരുടെ പേരുകൾ നിർദേശിക്കാനാണ്​ അവസരമുള്ളത്​.18 വയസ്സിന്​ മുകളിലുള്ള എമിറേറ്റ്​സ്​ ഐ.ഡിയുള്ളവർക്ക്​ ​ ഒരു സമയം അഞ്ച്​ പേരെ വരെ നിർദേശിക്കാം. കൂടുതൽ പേരെ നിർദേശിക്കാനും അവസരമുണ്ട്​. ദുബൈ സാമ്പത്തിക-ടൂറിസം വകുപ്പിന്‍റെ ഓൺലൈൻ സംവിധാനത്തിലൂടെ സന്ദർശകർ ദുബൈയിൽ എത്തുന്നതിന്​ മുമ്പ്​ പേരുകൾ നിർദേശിക്കണം. ഹോട്ടലുകൾ, റെസ്​​റ്ററന്‍റുകൾ, വിനോദ സഞ്ചാര കേന്ദ്രങ്ങൾ തുടങ്ങിയവയിൽ ഉപയോഗപ്പെടുത്താവുന്ന കൂപ്പണുകളാണ്​ ലഭിക്കുക. ഈ കൂപ്പണുകൾക്ക്​ ഡിസംബർ 31 വരെ കാലാവധിയുണ്ടാകും.