ഡൽഹി: എസ്ഐആർ മൂന്നാംഘട്ടം പ്രഖ്യാപിച്ച് തിരഞ്ഞെടുപ്പ് കമ്മീഷൻ. പതിനാറ് സംസ്ഥാനങ്ങളിലും മൂന്ന് കേന്ദ്ര ഭരണ പ്രദേശങ്ങളിലുമാണ് എസ്ഐആർ നടപ്പാക്കുകയെന്ന് കമ്മീഷൻ അറിയിച്ചു. ഹിമാചൽ പ്രദേശ്, ലഡാക്ക്, കാശ്മീർ എന്നിവിടങ്ങളിലേത് സെൻസസ്, കാലാവസ്ഥ എന്നിവ കണക്കിലെടുത്ത് പിന്നീട് പ്രഖ്യാപിക്കും.
3.94 ലക്ഷം ബൂത്ത് ലെവൽ ഓഫീസർമാർ എസ്ഐആറിന്റെ ഭാഗമാകും. 36.73 കോടി വോട്ടർമാരെ ഇവർ സന്ദർശിക്കുകയും ചെയ്യും. കൂടാതെ, രാഷ്ട്രീയ പാർട്ടികൾ നിയമിക്കുന്ന 3.42 ലക്ഷം ബൂത്ത് ലെവൽ ഏജന്റുമാരുടെ സഹായവും ലഭ്യമാക്കും. സെൻസസ് നടപടികൾക്കൊപ്പം തന്നെയാണ് എസ്ഐആർ നടപ്പാക്കുക. അർഹരായ എല്ലാ വോട്ടർമാരെയും പട്ടികയിൽ ഉൾപ്പെടുത്തുകയും, മരണപ്പെട്ടവരോ താമസം മാറിയവരോ ആയ അയോഗ്യരെ പട്ടികയിൽ നിന്ന് ഒഴിവാക്കുകയും ചെയ്യുമെന്ന് കമ്മീഷൻ അറിയിച്ചു. അസം, ബംഗാൾ, കേരളം, യുപി തുടങ്ങിയ സംസ്ഥാനങ്ങളിൽ ആണ് ഇതിനോടകം എസ്ഐആർ നടപ്പാക്കിയത്.
