ഒരു ലക്ഷം ടൺ ഇഹ്റാം വസ്ത്രങ്ങൾ പുനരുപയോഗിക്കും; അറിയിച്ച് സൗദി ഫാഷൻ കമ്മീഷൻ

റിയാദ്: ഒരു ലക്ഷം ടൺ വരുന്ന ഇഹ്റാം വസ്ത്രങ്ങൾ പുനരുപയോഗിക്കുമെന്ന് സൗദി ഫാഷൻ കമ്മീഷൻ. പാരിസ്ഥിതിക ആഘാതം കുറയ്ക്കാനും സുസ്ഥിര ഭാവിയിലേക്ക് നീങ്ങാനുമുള്ള പ്രധാന ചുവടുവയ്പ്പാണിതെന്ന് അധികൃതർ പറഞ്ഞു. ഈ പ്രക്രിയ 61.5 കോടി കിലോ കാർബൺ പുറന്തള്ളൽ ഒഴിവാക്കാൻ സഹായിക്കുമെന്നും വിശദീകരിച്ചു. ഇത് ഏകദേശം 270 ലക്ഷം മരങ്ങൾ നട്ടുപിടിപ്പിക്കുന്നതിന് തുല്യമാണെന്നും ചൂണ്ടിക്കാട്ടി. ഫാഷൻ വ്യവസായത്തിൽ സുസ്ഥിര രീതികൾ പ്രോത്സാഹിപ്പിക്കാനും മാലിന്യവും കാർബൺ പുറന്തള്ളലും കുറയ്ക്കാനും പരിസ്ഥിതി സുസ്ഥിരതാ ലക്ഷ്യങ്ങൾ കൈവരിക്കാനുമുള്ള ശ്രമങ്ങളുടെ ഭാഗമായാണ് നടപടി.