കൊൽക്കത്ത: ഇക്കഴിഞ്ഞ പശ്ചിമ ബംഗാൾ നിയമസഭാ തെരഞ്ഞെടുപ്പിൽ ബിജെപി പ്രയോഗിച്ച തെരഞ്ഞെടുപ്പ് തന്ത്രങ്ങൾ ഇനി മാനേജ്മെന്റ് വിദ്യാർത്ഥികൾക്ക് പഠനവിഷയമാകും. ഐഐഎം കൽക്കട്ടയാണ് ബിജെപിയുടെ ബംഗാളിലെ വിജയ തന്ത്രങ്ങളേക്കുറിച്ച് ഒരു പ്രത്യേക കേസ് സ്റ്റഡി തയ്യാറാക്കുന്നത്. ബിജെപിയുടെ തെരഞ്ഞെടുപ്പ് മാനേജ്മെന്റിനെക്കുറിച്ചുള്ള സ്ട്രാറ്റജിക് അനാലിസിസ് ആണ് ഐഐഎം കൽക്കട്ട നടത്തുന്നത്. ഐഐഎം ഡയറക്ടർ അലോക് റായ്, സ്ട്രാറ്റജി ഗ്രൂപ്പ് പ്രൊഫസർ രമ്യ വെങ്കിടേശ്വരൻ, ബോധിബ്രത നാഗ് എന്നിവർ ചേർന്നാണ് ഈ പഠന റിപ്പോർട്ട് തയ്യാറാക്കുന്നത്.
ഐഐഎം കൽക്കട്ടയുടെ കേസ് റിസർച്ച് സെന്റർ വഴി ഈ പഠന റിപ്പോർട്ട് ലോകമെമ്പാടുമുള്ള മറ്റ് മാനേജ്മെന്റ് ഇൻസ്റ്റിറ്റ്യൂട്ടുകൾക്കും ലഭ്യമാക്കും. ഭൂരിഭാഗം സർവേകളും തൃണമൂൽ കോൺഗ്രസിന്റെ വിജയം പ്രവചിച്ചിരുന്നിടത്ത്, ബിജെപി വൻ വിജയം നേടിയത് എങ്ങനെയെന്നത് മാനേജ്മെന്റ് വിദ്യാർത്ഥികൾക്ക് കൗതുകകരമായ വിഷയമാകുമെന്ന് ഡയറക്ടർ അലോക് റായ് പറഞ്ഞു. ബിജെപിയുടെ ഗ്രാസ്റൂട്ട് ലെവൽ പ്രവർത്തനങ്ങൾ, നേതൃപാടവം, ബൂത്ത് തലത്തിലുള്ള സംഘടനാ സംവിധാനം എന്നിവ ഇതിൽ വിശകലനം ചെയ്യും.
ഒരു സ്ഥാപനത്തിന് പുറത്തുള്ള സംഘടനാ സാഹചര്യങ്ങളിൽ എങ്ങനെ സ്ട്രാറ്റജിക് മാനേജ്മെന്റ് തത്വങ്ങൾ ഉപയോഗിക്കാം എന്നതിന്റെ ഉദാഹരണമായിട്ടാണ് ഇത് വിദ്യാർത്ഥികൾക്ക് മുന്നിലെത്തുക. കേസ് സ്റ്റഡി തയ്യാറാക്കുന്നതിന്റെ ഭാഗമായി ബിജെപി നേതാക്കളായ സുനിൽ ബൻസാൽ, സമിക് ഭട്ടാചാര്യ, സുകാന്ത് മജുംദാർ എന്നിവരുമായി ഐഐഎം അധികൃതർ ചർച്ചകൾ നടത്തി. കേന്ദ്ര ആഭ്യന്തര മന്ത്രി അമിത് ഷാ, സുവേന്ദു അധികാരി എന്നിവരുമായും സംസാരിക്കാൻ പദ്ധതിയുണ്ട്. അതേസമയം ഐഐഎം കൽക്കട്ടയുടെ ഈ നീക്കത്തെ തൃണമൂൽ കോൺഗ്രസ് എംഎൽഎ കുനാൽ ഘോഷ് വിമർശിച്ചു. മാനേജ്മെന്റ് വിദ്യാർത്ഥികൾക്ക് പഠിക്കാൻ മറ്റ് നിരവധി സാമൂഹിക ശാസ്ത്ര വിഷയങ്ങളുണ്ടെന്നും രാഷ്ട്രീയ വിജയങ്ങൾ അതിൽ ഉൾപ്പെടുത്തേണ്ടതില്ലെന്നും അദ്ദേഹം അഭിപ്രായപ്പെട്ടു.
