അബൂദബി: ഇത്തിഹാദ് റെയിൽ യാത്ര സർവിസ് വൻ ഹിറ്റ്. ജൂൺ 30ന് സർവിസ് ആരംഭിച്ച് അഞ്ച് ആഴ്ചക്കകം വിറ്റഴിഞ്ഞത് 70,000ൽ അധികം ടിക്കറ്റുകളാണ്. യുഎഇയിലുടനീളമുള്ളവർ ട്രെയിൻ യാത്ര വലിയ തോതിൽ തെരഞ്ഞെടുക്കുന്നതായി ഇത്തിഹാദ് റെയിൽ വ്യക്തമാക്കി. ഭൂരിഭാഗം യാത്രക്കാരും മുൻകൂട്ടി തന്നെ ടിക്കറ്റ് ബുക്ക് ചെയ്യുന്നുണ്ട്. ശരാശരി 12 ദിവസം മുമ്പെങ്കിലും യാത്രകൾ ബുക്ക് ചെയ്യുന്നുണ്ടെന്നും ഇത്തിഹാദ് റെയിൽ പറഞ്ഞു.ആഗസ്റ്റ് 15ന് അബൂദബിയിൽ നിന്ന് ഫുജൈറയിലേക്കുള്ള ട്രെയിനിന്റെ ടിക്കറ്റ് ഇതിനകം വിറ്റുതീർന്നു. ഓരോ യാത്രയിലും 400 യാത്രക്കാർക്കാണ് അവസരം. ജൂൺ 30ന് സർവിസ് ആരംഭിച്ച ശേഷം 175 ട്രെയിനുകൾ പൂർണ യാത്ര കപ്പാസിറ്റിയിൽ സർവിസ് നടത്തി. യാത്രക്കാർ രണ്ടാഴ്ച മുമ്പ് തന്നെ ടിക്കറ്റ് ബുക്ക് ചെയ്ത് യാത്രകൾ ക്രമീകരിക്കുന്നതായി ഇത്തിഹാദ് റെയിലിന്റെ ചീഫ് ഓപ്പറേറ്റിംഗ് ഓഫീസർ അസ്സ അൽ സുവൈദി പറഞ്ഞു. ആവശ്യമുള്ളിടത്ത് അധിക ശേഷി അവതരിപ്പിക്കുമെന്നും ഇത്തിഹാദ് റെയിൽ വ്യക്തമാക്കി. അഞ്ച് വർഷത്തെ കരാറിൽ ഇത്തിഹാദ് റെയിലിന്റെ എക്സ്ക്ലൂസീവ് കാർ വാടക പങ്കാളിയായി ത്രിഫ്റ്റി റെന്റൽ കാറിനെ പ്രഖ്യാപിച്ചിട്ടുണ്ട്. പുതിയ ബസ് സർവീസുകൾ അവതരിപ്പിച്ചു, സ്റ്റേഷനുകളിൽ നിന്നുള്ള ടാക്സി സേവനങ്ങളിൽ യാംഗോയാണ് പങ്കാളി.
കുടുംബ യാത്രകൾ, ബിസിനസ് യാത്രകൾ, വിദ്യാഭ്യാസ യാത്രകൾ, വിനോദ അനുഭവങ്ങൾ അല്ലെങ്കിൽ യുഎഇയിലുടനീളമുള്ള പുതിയ ലക്ഷ്യസ്ഥാനങ്ങളിലേക്ക് എത്തൽ എന്നിങ്ങനെ വിവിധ ആവശ്യങ്ങൾ നിറവേറ്റുന്ന ഗതാഗത ഓപ്ഷനായി പാസഞ്ചർ ട്രെയിൻ മാറിയതായി ഇത്തിഹാദ് റെയിൽ മൊബിലിറ്റിയുടെ എക്സിക്യൂട്ടീവ് ഡയറക്ടർ അദ്റ അൽ മൻസൂരി പറഞ്ഞു. ജൂൺ 30ന് അബൂദബി, ഫുജൈറ സ്റ്റേഷണുകളാണ് തുറന്നത്. ബാക്കി എട്ട് സ്റ്റേഷനുകൾ ഒരു വർഷത്തിനുള്ളിൽ പ്രവർത്തനം ആരംഭിക്കും. ദുബൈയിലെ ജുമൈറ ഗോൾഫ് എസ്റ്റേറ്റിലെ സ്റ്റേഷനും ഷാർജയിലെ അൽ ദൈദ് സ്റ്റേഷനും സെപ്റ്റംബർ 30 ന് പ്രവർത്തനക്ഷമമാകും.അൽ ദഫ്റയിലെ മദീനത്ത് സായിദ്, ലിവ സ്റ്റേഷനുകൾ മേഖലയിലെ ഉത്സവ സീസണിനോടനുബന്ധിച്ച് ഡിസംബർ 30ന് ഉദ്ഘാടനം ചെയ്യും. നേരത്തേ നവംബർ 30ന് തീരുമാനിച്ച ഉദ്ഘാടനം ഉത്സവ സീസൺ പ്രമാണിച്ചാണ് ഡിസംബർ 30ലേക്ക് മാറ്റിയത്. അൽ സില, അൽ ദന, അൽ മിർഫ സ്റ്റേഷനുകളും ഡിസംബർ 30 മുതൽ യാത്രക്കാരെ സ്വാഗതം ചെയ്യും. ഷാർജയിലെ യൂണിവേഴ്സിറ്റി സിറ്റി സ്റ്റേഷൻ 2027 മാർച്ച് 30 ന് തുറക്കുന്ന റെയിൽ ശൃംഖലയിലെ അവസാന സ്റ്റോപ്പായിരിക്കും.
