ന്യൂഡൽഹി: സമാധാനപരമായ പ്രതിഷേധങ്ങൾ ജനാധിപത്യത്തിന്റെ അവിഭാജ്യ ഘടകമാണെന്നും ജനങ്ങളാൽ തിരഞ്ഞെടുക്കപ്പെട്ട സർക്കാർ പൗരന്മാരുടെ ശബ്ദം കേൾക്കാൻ ബാധ്യസ്ഥമാണെന്നും കോക്ക്റോച്ച് ജനതാ പാർട്ടി (CJP) നേതാവ് അഭിജീത് ദീപ്കെ. പ്രതിഷേധങ്ങളെ അടിച്ചമർത്തുന്നതിനുള്ള സർക്കാർ നടപടികൾ ബിസിനസ് മേഖലയെയും പൊതുഗതാഗതത്തെയും ബാധിക്കുമെന്ന് അദ്ദേഹം എക്സിൽ പങ്കുവെച്ച കുറിപ്പിൽ ചൂണ്ടിക്കാട്ടി.

സമാധാനപരമായ പ്രതിഷേധങ്ങളല്ല ബിസിനസുകൾക്ക് തിരിച്ചടിയാകുന്നതെന്നും നഗരങ്ങൾ അടച്ചിടുക, ഇന്റർനെറ്റ് സേവനങ്ങൾ നിർത്തിവയ്ക്കുക, പൗരന്മാരുടെ സഞ്ചാരസ്വാതന്ത്ര്യം നിയന്ത്രിക്കുക തുടങ്ങിയ നടപടികളാണ് കൂടുതൽ പ്രതിസന്ധികൾ സൃഷ്ടിക്കുന്നതെന്നും ദീപ്കെ അഭിപ്രായപ്പെട്ടു.

ഗാന്ധിജിയുടെ സമാധാനത്തിന്റെയും അഹിംസയുടെയും പാത പിന്തുടരാനാണ് പാർട്ടി രൂപീകരണം മുതൽ ശ്രമിക്കുന്നതെന്ന് അദ്ദേഹം പറഞ്ഞു. മുംബൈ, പൂനെ, ജയ്പുർ, ലഖ്‌നൗ, ബെംഗളൂരു, നാഗ്പുർ തുടങ്ങിയ നഗരങ്ങളിൽ പാർട്ടി നടത്തിയ പ്രതിഷേധങ്ങൾ സമാധാനപരമായിരുന്നുവെന്നും അദ്ദേഹം അവകാശപ്പെട്ടു. ജയ്പുരിൽ തനിക്കുനേരെ ശാരീരിക ആക്രമണമുണ്ടായിട്ടും തിരിച്ചടിച്ചില്ലെന്നും അക്രമത്തിന് അക്രമംകൊണ്ട് മറുപടി നൽകുന്നത് പാർട്ടിയുടെ മൂല്യങ്ങൾക്ക് വിരുദ്ധമാണെന്നും ദീപ്കെ വ്യക്തമാക്കി.

ഭരണഘടന ഉറപ്പുനൽകുന്ന അവകാശങ്ങൾ വിനിയോഗിച്ചുകൊണ്ട് ജനാധിപത്യപരമായി പ്രതിഷേധിക്കാനാണ് പാർട്ടി ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു. സർക്കാരിനോട് ചോദ്യങ്ങൾ ചോദിക്കുന്നതും അനീതിക്കെതിരെ തെരുവിലിറങ്ങുന്നതും പൊതുപദവികൾ വഹിക്കുന്നവരോട് ഉത്തരവാദിത്തം ആവശ്യപ്പെടുന്നതും അരാജകത്വമായി കാണാനാവില്ലെന്നാണ് അദ്ദേഹത്തിന്റെ നിലപാട്.

പ്രതിപക്ഷത്തായിരുന്നപ്പോൾ പ്രതിഷേധങ്ങൾ സംഘടിപ്പിക്കുകയും സർക്കാരുകളെ ചോദ്യം ചെയ്യുകയും ചെയ്ത രാഷ്ട്രീയ പാർട്ടികൾ അധികാരത്തിലെത്തിയശേഷം സമാനമായ പ്രതിഷേധങ്ങളെ എതിർക്കുന്നത് വൈരുധ്യമാണെന്നും ദീപ്കെ വിമർശിച്ചു. അധികാരത്തിലിരിക്കുന്നവർക്ക് അനുകൂലമായിരിക്കുമ്പോൾ മാത്രം പ്രതിഷേധങ്ങളെ അംഗീകരിക്കുകയും വിമർശനം ഉയരുമ്പോൾ നിയന്ത്രണങ്ങൾ ഏർപ്പെടുത്തുകയും ചെയ്യുന്നത് ജനാധിപത്യത്തിന്റെ അടിസ്ഥാന തത്വങ്ങൾക്ക് വിരുദ്ധമാണെന്നും അദ്ദേഹം അഭിപ്രായപ്പെട്ടു.

പൗരന്മാർക്ക് പ്രത്യേക പരിഗണനകളല്ല, ഭരണഘടന ഉറപ്പുനൽകുന്ന അവകാശങ്ങൾ വിനിയോഗിക്കാനുള്ള അവസരമാണ് വേണ്ടതെന്നും അദ്ദേഹം പറഞ്ഞു. ജനങ്ങൾ തിരഞ്ഞെടുക്കുന്ന പ്രതിനിധികളോട് ചോദ്യങ്ങൾ ചോദിക്കാനും അവരുടെ പ്രവർത്തനങ്ങളിൽ ഉത്തരവാദിത്തം ആവശ്യപ്പെടാനും ഓരോ പൗരനും അവകാശമുണ്ടെന്നും ദീപ്കെ ചൂണ്ടിക്കാട്ടി.

വോട്ടെടുപ്പ് പൂർത്തിയാകുന്നതോടെ ജനാധിപത്യം അവസാനിക്കുന്നില്ലെന്നും ജനങ്ങളുടെ ശബ്ദം കേൾക്കുകയും അവരുടെ ചോദ്യങ്ങൾക്ക് മറുപടി നൽകുകയും ചെയ്യുന്നതാണ് തിരഞ്ഞെടുക്കപ്പെട്ട സർക്കാരിന്റെ ഉത്തരവാദിത്തമെന്നും അഭിജീത് ദീപ്കെ വ്യക്തമാക്കി.

സമാധാനപരമായ പ്രതിഷേധങ്ങൾ, പൗരാവകാശങ്ങൾ, പൊതുസുരക്ഷ എന്നിവ തമ്മിലുള്ള സന്തുലിതാവസ്ഥ എങ്ങനെ ഉറപ്പാക്കണമെന്ന ചർച്ചയ്ക്കും അദ്ദേഹത്തിന്റെ പ്രസ്താവന വഴിയൊരുക്കിയിട്ടുണ്ട്.