റിയാദ്: ഹജ്ജ് സീസണിൽ വിവിധ സർക്കാർ ഏജൻസികൾ തമ്മിലുള്ള മാധ്യമ ഏകോപനത്തിന്റെ പ്രാധാന്യത്തെക്കുറിച്ചും, തീർഥാടകരുടെ സുരക്ഷ വർധിപ്പിക്കുന്നതിൽ ബോധവൽക്കരണ സന്ദേശങ്ങളുടെ പങ്കിനെക്കുറിച്ചും മൂന്നാമത് ഹജ്ജ് ആരോഗ്യ സുരക്ഷാ ഫോറത്തിൽ പ്രത്യേക ചർച്ച സംഘടിപ്പിച്ചു. കഴിഞ്ഞ ദിവസമായിരുന്നു ചർച്ച നടന്നത്.
തീർഥാടകർക്കും സന്ദർശകർക്കും ഇടയിൽ കൃത്യമായ ബോധവൽക്കരണം നടത്തുന്നതിനായി സൗദി ആഭ്യന്തര മന്ത്രാലയം വിവിധ ഭാഷകളിൽ പുറത്തിറക്കുന്ന ബോധവൽക്കരണ സന്ദേശങ്ങളെക്കുറിച്ച് സെഷനിൽ എടുത്തുപറഞ്ഞു. വിവരങ്ങൾ വേഗത്തിൽ ജനങ്ങളിലേക്ക് എത്തിക്കുന്നതിനും ഹജ്ജ് സീസണിലെ പുതിയ സംഭവവികാസങ്ങൾ തത്സമയം പങ്കുവെക്കുന്നതിനും ഡിജിറ്റൽ പ്ലാറ്റ്ഫോമുകളും ആധുനിക മാധ്യമങ്ങളും ഉപയോഗിക്കേണ്ടതിന്റെ പ്രാധാന്യവും ചർച്ചയിൽ ഊന്നിപ്പറഞ്ഞു. ആരോഗ്യ സുരക്ഷാ പദ്ധതികളെ പിന്തുണക്കുന്നതിലും, ഭരണകൂടം നൽകുന്ന സേവനങ്ങളിൽ തീർഥാടകർക്കുള്ള ആത്മവിശ്വാസം വർധിപ്പിക്കുന്നതിലും മാധ്യമങ്ങൾ ഒരു പ്രധാന പങ്കാളിയാണെന്ന് യോഗം വിലയിരുത്തി.
