പാകിസ്താൻ മുൻ പ്രധാനമന്ത്രിയും ക്രിക്കറ്റ് ഇതിഹാസവുമായ ഇമ്രാൻ ഖാനെ പിന്തുണച്ച് സംസാരിച്ചതിന് പിന്നാലെ മുൻ ഇംഗ്ലണ്ട് താരങ്ങളായ മൈക്കൽ ആതർട്ടനെയും നാസർ ഹുസൈനെയും കമന്ററി പാനലിൽ നിന്ന് ഒഴിവാക്കിയതായി റിപ്പോർട്ട്. പാകിസ്താൻ ക്രിക്കറ്റ് ബോർഡിന്റെ നടപടിയാണ് ഇപ്പോൾ ക്രിക്കറ്റ് ലോകത്ത് ചർച്ചയാകുന്നത്.

ഒക്ടോബർ 18 മുതൽ 31 വരെ പാകിസ്താനിൽ നടക്കുന്ന ഏകദിന ത്രിരാഷ്ട്ര പരമ്പരയ്ക്കുള്ള കമന്ററി സംഘത്തിൽ നിന്നാണ് ഇരുവരെയും ഒഴിവാക്കിയത്. പാകിസ്താൻ, ഇംഗ്ലണ്ട്, ശ്രീലങ്ക ടീമുകൾ പങ്കെടുക്കുന്ന ടൂർണമെന്റിനായി ആറംഗ കമന്ററി പാനലാണ് ഒരുക്കിയിരുന്നത്. എന്നാൽ, ആതർട്ടനെയും നാസർ ഹുസൈനെയും ഒഴിവാക്കിയതിന്റെ ഔദ്യോഗിക കാരണം പിസിബി വ്യക്തമാക്കിയിട്ടില്ല.

ഇമ്രാൻ ഖാനുമായി ബന്ധപ്പെട്ട വിഷയത്തിൽ ഇരുവരും സ്വീകരിച്ച നിലപാടാണ് നടപടിക്ക് പിന്നിലെന്നാണ് റിപ്പോർട്ടുകൾ സൂചിപ്പിക്കുന്നത്. ഓഗസ്റ്റിൽ ലോർഡ്‌സിൽ നടന്ന ഇംഗ്ലണ്ട്–പാകിസ്താൻ ടെസ്റ്റ് മത്സരത്തിനിടെ മൈക്കൽ ആതർട്ടൻ ഇമ്രാൻ ഖാന്റെ മക്കളായ കാസിം, സുലൈമാൻ എന്നിവരുമായി അഭിമുഖം നടത്തിയിരുന്നു.

സ്കൈ സ്പോർട്സ് സംപ്രേഷണം ചെയ്ത അഭിമുഖത്തിൽ, ജയിലിൽ കഴിയുന്ന ഇമ്രാൻ ഖാന്റെ ആരോഗ്യനില മോശമാണെന്നും അദ്ദേഹം ഒറ്റപ്പെട്ട സാഹചര്യത്തിലാണെന്നും മക്കൾ ആരോപിച്ചിരുന്നു. ഈ അഭിമുഖം രാജ്യാന്തര ക്രിക്കറ്റ് വേദിയെ രാഷ്ട്രീയ ആവശ്യങ്ങൾക്കായി ഉപയോഗിക്കുന്നതാണെന്ന് ചൂണ്ടിക്കാട്ടി പാകിസ്താൻ ക്രിക്കറ്റ് ബോർഡ് സ്കൈ സ്പോർട്സിനെതിരെ പരാതി നൽകിയതായും റിപ്പോർട്ടുകളുണ്ട്.

ഇമ്രാൻ ഖാൻ പാകിസ്താന്റെ മുൻ പ്രധാനമന്ത്രി മാത്രമല്ല, രാജ്യത്തിന് ലോകകപ്പ് നേടിക്കൊടുത്ത മുൻ നായകൻ കൂടിയാണ്. അദ്ദേഹത്തിന്റെ രാഷ്ട്രീയ ജീവിതവും തടവിലെ സാഹചര്യങ്ങളും അന്താരാഷ്ട്ര തലത്തിൽ ചർച്ചയാകുന്നതിനിടെയാണ് കമന്റേറ്റർമാരെ ഒഴിവാക്കിയെന്ന വാർത്ത പുറത്തുവരുന്നത്.

അതേസമയം, കമന്ററി പാനലിൽ നിന്നുള്ള ഒഴിവാക്കലിന് പിന്നിലെ കാരണം ഔദ്യോഗികമായി സ്ഥിരീകരിച്ചിട്ടില്ല. പിസിബിയുടെ നടപടിയെക്കുറിച്ചുള്ള കൂടുതൽ വിശദീകരണം പുറത്തുവരുമോയെന്നാണ് ക്രിക്കറ്റ് ആരാധകർ ഉറ്റുനോക്കുന്നത്.