സന്ദർശകരെ ആകർഷിച്ച് ചെങ്കടൽ തീരത്തെ അൽദുഖം ബീച്ച്

തബൂക്ക്: വേനലവധിക്കാലത്ത് സന്ദർശകരെ ആകർഷിച്ച് സൗദിയിൽ ചെങ്കടൽ തീരത്തുള്ള അൽദുഖം ബീച്ച്. നീലക്കടൽ, വെള്ള മണൽ ബീച്ച്, സുഖകരമായ കാലാവസ്ഥ, പച്ചപ്പ് നിറഞ്ഞ ഇടങ്ങൾ തുടങ്ങിയവയാണ് താമസക്കാരെയും സന്ദർശകരെയും ആകർഷിക്കുന്നത്. തബൂക്ക് പ്രവിശ്യയിലെ ഉംലുജ് ഗവർണറേറ്റിലാണ് ഈ മനോഹര തീരം. ഗവർണറേറ്റിലെ പ്രധാന വിനോദസഞ്ചാര കേന്ദ്രങ്ങളിലൊന്നാണിത്. കുട്ടികൾക്കുള്ള കളിസ്ഥലങ്ങൾ, ഇരിപ്പിടങ്ങൾ, കഫേകൾ തുടങ്ങിയവയും പ്രദേശത്തുണ്ട്. 24 മണിക്കൂറും പ്രവേശനം ലഭിക്കും. കുടുംബങ്ങൾക്ക് പിക്‌നിക്കിനും ഔട്ട്‌ഡോർ വിനോദത്തിനും ഏറെ അനുയോജ്യമാണിവിടം. രാവിലെയും വൈകുന്നേരവുമാണ് കൂടുതൽ പേരെത്തുന്നത്.