ബെർലിൻ: മനുഷ്യരൂപത്തിലുള്ള റോബോട്ട് പെൺകുട്ടിയോട് അപമര്യാദയായി പെരുമാറിയെന്ന റിപ്പോർട്ടിനെത്തുടർന്ന് ജർമനിയിൽ പൊലീസ് അന്വേഷണം. കൊളോൺ നഗരത്തിലെ ഒരു റസ്റ്റോറന്റിൽ വെച്ചാണ് സംഭവം നടന്നതെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.
അയൺമാന്റെ രൂപത്തിലുള്ള ഹ്യൂമനോയിഡ് റോബോട്ട് 16 വയസ്സുകാരിയുടെ പിന്നിലൂടെ എത്തി കടന്നുപിടിക്കുകയും അനുചിതമായ ചലനങ്ങൾ നടത്തുകയും ചെയ്തെന്നാണ് ആരോപണം. സംഭവവുമായി ബന്ധപ്പെട്ട് റോബോട്ടിന്റെ ഉടമയായ 16 വയസ്സുകാരനെയും 19 വയസ്സുള്ള സുഹൃത്തിനെയും പൊലീസ് കസ്റ്റഡിയിലെടുത്തു.
സംഭവത്തിന് പിന്നാലെ സമീപത്തെ ഒരു ബ്ലോക്കിൽ നിന്നാണ് ഇരുവരെയും പൊലീസ് കണ്ടെത്തിയത്. പിന്നീട് ഒരു കാറിനുള്ളിൽ സൂക്ഷിച്ചിരുന്ന റോബോട്ടും കണ്ടെത്തി. കറുത്ത മീശയും സ്വർണനിറത്തിലുള്ള മാലയും വെള്ള ബനിയനും ധരിച്ച റോബോട്ടിന്റെ ചിത്രവും പൊലീസ് പുറത്തുവിട്ടതായി റിപ്പോർട്ടുകളുണ്ട്.
മുൻകൂട്ടി പ്രോഗ്രാം ചെയ്ത ചലനങ്ങളിലൂടെ നിയന്ത്രിക്കാൻ കഴിയുന്ന റോബോട്ടാണിതെന്നാണ് പ്രാഥമിക വിവരം. സംഭവസമയത്ത് ആരെങ്കിലും റോബോട്ടിന്റെ ചലനങ്ങൾ ബോധപൂർവം നിയന്ത്രിച്ചിരുന്നോ എന്നതടക്കമുള്ള കാര്യങ്ങളാണ് പൊലീസ് പരിശോധിക്കുന്നത്.
റോബോട്ടിനൊപ്പം സംശയിക്കപ്പെടുന്നവരുടെ കൈവശമുണ്ടായിരുന്ന രണ്ട് മൊബൈൽ ഫോണുകളും പൊലീസ് പിടിച്ചെടുത്തിട്ടുണ്ട്. സംഭവത്തിന്റെ യഥാർഥ സാഹചര്യം കണ്ടെത്തുന്നതിനായി തുടർപരിശോധനകൾ നടക്കുകയാണ്.
മനുഷ്യരൂപത്തിലുള്ള റോബോട്ടുകളുടെ ഉപയോഗം വ്യാപകമാകുന്ന സാഹചര്യത്തിൽ ഇത്തരം ഉപകരണങ്ങളുടെ നിയന്ത്രണവും സുരക്ഷയും സംബന്ധിച്ച ചർച്ചകൾക്കും സംഭവം വഴിവെച്ചിട്ടുണ്ട്. സാങ്കേതികവിദ്യയുടെ ദുരുപയോഗം തടയുന്നതിനൊപ്പം പൊതുസ്ഥലങ്ങളിൽ ഇത്തരം ഉപകരണങ്ങൾ പ്രവർത്തിപ്പിക്കുമ്പോൾ പാലിക്കേണ്ട സുരക്ഷാനിബന്ധനകളും പ്രധാനമാണ്.
അതേസമയം, സംഭവത്തിൽ ആരാണ് റോബോട്ടിന്റെ ചലനങ്ങൾ നിയന്ത്രിച്ചതെന്നും മനഃപൂർവമായ ഇടപെടൽ ഉണ്ടായിരുന്നോയെന്നും അന്വേഷണത്തിലൂടെ മാത്രമേ വ്യക്തമാകൂ.
