വത്തിക്കാൻ സിറ്റി: ശസ്ത്രക്രിയയ്ക്ക് ശേഷം ലിയോ പതിനാലാമൻ മാർപാപ്പ ആദ്യമായി വിശ്വാസികൾക്ക് മുന്നിലെത്തി. ഞായറാഴ്ച അപ്പോസ്തോലിക് കൊട്ടാരത്തിൽനിന്ന് വിശ്വാസികളെ അഭിസംബോധന ചെയ്ത മാർപാപ്പയ്ക്ക് സെന്റ് പീറ്റേഴ്സ് ചത്വരത്തിൽ തടിച്ചുകൂടിയവർ ആവേശത്തോടെ വരവേൽപ്പ് നൽകി. വിശ്വാസികളെ കൈവീശി അഭിവാദ്യം ചെയ്ത അദ്ദേഹം തുടർന്ന് പ്രാർഥനയ്ക്ക് നേതൃത്വം നൽകി.
മാർപാപ്പ പൊതുവേദിയിൽ തിരിച്ചെത്തിയതോടെ സെന്റ് പീറ്റേഴ്സ് ചത്വരത്തിൽ ഒത്തുകൂടിയ വിശ്വാസികൾ ആഹ്ലാദാരവങ്ങൾ മുഴക്കി. ശസ്ത്രക്രിയയ്ക്കുശേഷം വിശ്രമത്തിലായിരുന്ന മാർപാപ്പയുടെ ആരോഗ്യനിലയെക്കുറിച്ച് ആശങ്കയിലായിരുന്ന വിശ്വാസികൾക്ക് അദ്ദേഹത്തിന്റെ തിരിച്ചുവരവ് ആശ്വാസമായി.
കഴിഞ്ഞ ചൊവ്വാഴ്ചയാണ് മാർപാപ്പയ്ക്ക് ശ്വാസകോശ അർബുദം സ്ഥിരീകരിച്ചതായി വത്തിക്കാൻ അറിയിച്ചത്. വലത് ശ്വാസകോശത്തിന്റെ താഴ്ഭാഗത്തുണ്ടായിരുന്ന മുഴ ശസ്ത്രക്രിയയിലൂടെ വിജയകരമായി നീക്കം ചെയ്തതായും വത്തിക്കാൻ വ്യക്തമാക്കിയിരുന്നു.
റോമിലെ ജെമെല്ലി ആശുപത്രിയിലായിരുന്നു ശസ്ത്രക്രിയ. തുടർന്ന് ആശുപത്രിയിൽ വിശ്രമത്തിലായിരുന്ന മാർപാപ്പ കഴിഞ്ഞ ദിവസമാണ് ആശുപത്രി വിട്ടത്. ശസ്ത്രക്രിയയ്ക്കുശേഷമുള്ള അദ്ദേഹത്തിന്റെ ആദ്യ പൊതുപരിപാടിയായിരുന്നു ഞായറാഴ്ച നടന്നത്.
