തമിഴ് താരം സന്താനത്തെ നായകനാക്കി നവാഗതനായ സുദാമൻ കൃഷ്ണ സംവിധാനം ചെയ്യുന്ന പുതിയ ചിത്രം ‘അതിസയ പിറവി’യുടെ ഫസ്റ്റ് ലുക്ക് പോസ്റ്റർ പുറത്തിറങ്ങി. വീനസ് ഇൻഫോടെയ്ൻമെന്റിന്റെയും കെ7 സ്റ്റുഡിയോസിന്റെയും ബാനറുകളിൽ കെ.ജെ. ഗണേഷും വിജയ് കെ. ചെല്ലിയയും ചേർന്നാണ് ചിത്രം നിർമ്മിക്കുന്നത്. ജി.വി. പ്രകാശ് കുമാറാണ് സംഗീതസംവിധാനം. ഗോപിക രമേഷാണ് ചിത്രത്തിലെ നായിക.
സയൻസ് ഫിക്ഷൻ, കോമഡി, മിസ്റ്ററി എന്നീ ഘടകങ്ങൾ സമന്വയിപ്പിക്കുന്ന ചിത്രത്തിന്റെ ഫസ്റ്റ് ലുക്ക് ഇതിനോടകം ശ്രദ്ധ നേടിക്കഴിഞ്ഞു. നീല നിറത്തിലുള്ള നിഗൂഢമായ ചുഴിക്കുള്ളിൽ അകപ്പെട്ട സന്താനത്തിന്റെ കഥാപാത്രത്തെയാണ് പോസ്റ്ററിൽ അവതരിപ്പിച്ചിരിക്കുന്നത്. ആംബുലൻസുമായി ബന്ധപ്പെട്ട ദൃശ്യങ്ങളും അസാധാരണമായ പശ്ചാത്തലവും ചിത്രത്തിന്റെ പ്രമേയത്തെക്കുറിച്ച് ആകാംക്ഷ ഉയർത്തുന്നു. കഥയുടെ വിശദാംശങ്ങൾ അണിയറപ്രവർത്തകർ ഇതുവരെ പുറത്തുവിട്ടിട്ടില്ല.
സന്താനത്തിന്റെ ഇരുപതാമത്തെ ചിത്രമായാണ് ‘അതിസയ പിറവി’ ഒരുങ്ങുന്നത്. കോമഡി വേഷങ്ങളിലൂടെ ശ്രദ്ധ നേടിയ താരം, ഇത്തവണ നിഗൂഢതയും സയൻസ് ഫിക്ഷനും കോർത്തിണക്കിയ കഥാപരിസരത്തിലാണ് എത്തുന്നത്.
വെറ്റ്രി, സ്മൃതി വെങ്കട്ട്, ജെൻസൺ ദിവാകർ, റെഡിൻ കിംഗ്സ്ലി, ജോർജ് മരിയൻ, പ്രദീപ് ആന്റണി, ഫൂസി, ടി.എസ്.ആർ. എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.
അണിയറപ്രവർത്തകർ: രചനയും സംവിധാനവും – സുദാമൻ കൃഷ്ണ; നിർമ്മാണം – കെ.ജെ. ഗണേഷ്, വിജയ് കെ. ചെല്ലിയ; സംഗീതം – ജി.വി. പ്രകാശ് കുമാർ; ഛായാഗ്രഹണം – റിച്ചാർഡ് എം. നാഥൻ; എഡിറ്റിംഗ് – പ്രവീൺ കെ.എൽ.; കലാസംവിധാനം – ജാക്കി; സംഘട്ടനം – ദിലീപ് സുബ്ബരായൻ; വസ്ത്രാലങ്കാരം – പ്രിയ രവി; പിആർഒ – ശബരി.
ചിത്രത്തിന്റെ റിലീസ് തീയതി സംബന്ധിച്ച ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല.
