കോഴിക്കോട്: കോഴിക്കോട് ഗ്രാമപഞ്ചായത്ത് ഓഫീസ് കെട്ടിടത്തിന്റെ കോണ്ക്രീറ്റ് സ്ലാബ് അടര്ന്നുവീണ് ഉദ്യോഗസ്ഥയ്ക്ക് പരിക്കേറ്റു. പേരാമ്പ്ര കൂത്താളിയിലാണ് സംഭവം. പഞ്ചായത്ത് ജീവനക്കാരി ശ്വേതയ്ക്കാണ് പരിക്കേറ്റത്. രാവിലെ ഓഫീസിലെത്തി കമ്പ്യൂട്ടറില് ജോലി ചെയ്തുകൊണ്ടിരിക്കെയായിരുന്നു അപകടം. വലിയ ശബ്ദത്തോടെ സ്ലാബിന്റെ ഒരു ഭാഗം ശ്വേതയുടെ ദേഹത്തേക്ക് പതിക്കുകയായിരുന്നു.
ഗ്രാമപഞ്ചായത്ത് പ്രസിഡന്റ് തണ്ടോറ ഉമ്മര് ഉള്പ്പെടെയുള്ള ജനപ്രതിനിധികള് ഓഫീസില് ഉണ്ടായിരുന്ന സമയത്താണ് സംഭവം ഉണ്ടായത്.
പരിക്കേറ്റ ശ്വേതയെ ഉടന് തന്നെ അടുത്തുള്ള സ്വകാര്യ ആശുപത്രിയില് പ്രവേശിപ്പിച്ചു. തുടര്ന്ന് കൂടുതല് വിദഗ്ധ ചികിത്സയ്ക്കായി പേരാമ്പ്ര ഇഎംഎസ് സഹകരണ ആശുപത്രിയിലേക്ക് മാറ്റി. 58 വര്ഷത്തോളം പഴക്കമുള്ള കെട്ടിടത്തിന്റെ ശോചനീയാവസ്ഥയാണ് അപകടത്തിന് കാരണമെന്നാണ് പ്രാഥമിക നിഗമനം. കെട്ടിടത്തിന്റെ ബലക്ഷയം സംബന്ധിച്ച് നേരത്തെ തന്നെ ആശങ്കകള് നിലനിന്നിരുന്നു.
