ഉത്തരാഖണ്ഡിൽ കാർ കൊക്കയിലേക്ക് മറിഞ്ഞ് എട്ട് മരണം

ഡെറാഡൂൺ: ഉത്തരാഖണ്ഡിൽ കാർ കൊക്കയിലേക്ക് മറിഞ്ഞ അപകടത്തിൽ എട്ടുപേർ മരിച്ചു. തെഹ്രി ഗർവാൾ ജില്ലയിലെ ചമ്പ ബ്ലോക്കിലാണ് അപകടം സംഭവിച്ചത്. 300 അടി താഴ്ചയിലേക്കാണ് കാർ മറിഞ്ഞത്. പരിക്കേറ്റവരെ ഉടനെത്തന്നെ തൊട്ടടുത്ത ആശുപത്രിയിൽ എത്തിച്ചതായാണ് വിവരം. അവർ അപകടനില തരണം ചെയ്തതായി ഡോക്ടർമാർ അറിയിച്ചു. എസ്.ഡി.ആർ.എഫ്, പോലീസ്, ആരോഗ്യവകുപ്പ് എന്നിവരുടെ നേതൃത്വത്തിൽ യുദ്ധകാലാടിസ്ഥാനത്തിലാണ് രക്ഷാപ്രവർത്തനം നടത്തിയത്. കാറിൽ ഉണ്ടായിരുന്നവരെയെല്ലാം പുറത്തെടുത്തെന്നും രക്ഷാപ്രവർത്തനം അവസാനിച്ചെന്നും അധികൃതർ വ്യക്തമാക്കി. ജില്ലാ മജിസ്‌ട്രേറ്റ്, എം.എൽ.എ എന്നിവർ സംഭവസ്ഥലം സന്ദർശിച്ചു. ഉത്തരാഖണ്ഡ് മുഖ്യമന്ത്രി പുഷ്കർ സിങ് ധാമി സംഭവത്തിൽ അനുശോചനം രേഖയപെടുത്തുകയും പരിക്കേറ്റവർക്ക് ആവശ്യമായ ചികിത്സ നൽകാൻ നിർദേശം നൽകുകയും ചെയ്തിട്ടുണ്ട്.