ഡൽഹി: നഗരത്തിൽ ശക്തമായ പൊടിക്കാറ്റ് വീശി. സൗത്ത് ഡൽഹി , സൗത്ത് ഈസ്റ്റ് ഡൽഹി , സൗത്ത് വെസ്റ്റ് ഡൽഹി, ന്യൂഡൽഹി , നോർത്ത് വെസ്റ്റ് ഡൽഹി എന്നിവിടങ്ങളിലാണ് പൊടിക്കാറ്റ് വീശിയത്. മണിക്കൂറിൽ111 കിലോമീറ്റർ വേഗതയിൽ കാറ്റടിക്കാൻ സാധ്യതയെന്നും മുന്നറിയിപ്പ്. ഇവിടങ്ങളിൽ മിതമായ മഴയും ശക്തമായ ഇടിമിന്നലും ഉണ്ടാകുമെന്ന് കാലാവസ്ഥാ വകുപ്പ് പ്രവചിച്ചു. എന്നിരുന്നാലും, വടക്കേ ഇന്ത്യൻ സംസ്ഥാനങ്ങളിൽ നിലവിൽ ഒറ്റപ്പെട്ട പ്രദേശങ്ങളിൽ ഉഷ്ണതരംഗ മുന്നറിയിപ്പ് നിലനിൽക്കുന്നുണ്ടെങ്കിലും പഞ്ചാബ്, ഹരിയാന, ഡൽഹി, ഉത്തർപ്രദേശ്, രാജസ്ഥാൻ എന്നിവിടങ്ങളിലെ വിവിധ ഭാഗങ്ങളിൽ ജൂൺ 10 നും ജൂൺ 14 നും ഇടയിൽ മഴ പ്രതീക്ഷിക്കുന്നു.
ഇന്ന് ഹരിയാന ചണ്ഡീഗഡിലും ഡൽഹിയിലും ജൂൺ 11 മുതൽ 15 വരെ പഞ്ചാബിലും പടിഞ്ഞാറൻ രാജസ്ഥാനിലും ഒറ്റപ്പെട്ട മഴയ്ക്ക് സാധ്യതയുണ്ടെന്ന് ഐഎംഡി ചൊവ്വാഴ്ച പുറത്തിറക്കിയ കാലാവസ്ഥാ മുന്നറിയിപ്പിൽ പറയുന്നു. ജൂൺ 9 മുതൽ 14 വരെ ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ് എന്നിവിടങ്ങളിൽ ഒറ്റപ്പെട്ട മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് പ്രവചിച്ചു. ജൂൺ 11 നും 12 നും ഇടയിൽ രാജസ്ഥാൻ, ഹരിയാന, ഡൽഹി, ഉത്തർപ്രദേശ് എന്നിവിടങ്ങളിൽ മണിക്കൂറിൽ 50-60 കിലോമീറ്റർ വേഗതയിൽ കാറ്റും ഇടിമിന്നലും ഉണ്ടാകുമെന്ന് ഐഎംഡി മുന്നറിയിപ്പ് നൽകിയിട്ടുണ്ട്.
ചൊവ്വാഴ്ച തെക്കുപടിഞ്ഞാറൻ മൺസൂൺ വടക്കൻ ബംഗാളിലേയും വടക്കുകിഴക്കൻ സംസ്ഥാനങ്ങളിലേക്കും പ്രവേശിച്ചു. അടുത്ത നാലോ അഞ്ചോ ദിവസങ്ങളിൽ കിഴക്കൻ, മധ്യ, പടിഞ്ഞാറൻ ഇന്ത്യയിലേക്ക് മൺസൂൺ മുന്നേറുന്നതിന് അനുകൂലമായ സാഹചര്യങ്ങൾ തുടരുമെന്ന് കാലാവസ്ഥാ ഓഫീസ് അറിയിച്ചു. വടക്കുകിഴക്കൻ ഭാഗത്തേക്ക് മൺസൂൺ കടന്നതിനാൽ, ജൂൺ 13 വരെ വടക്കൻ ബംഗാളിലെ ഡാർജിലിംഗ്, കലിംപോങ്, അലിപുർദുവാർ, ജൽപൈഗുരി, കൂച്ച് ബെഹാർ ജില്ലകളിൽ കനത്ത മഴ പ്രതീക്ഷിക്കുന്നു.
