ഗുരുവായൂരില്‍ വെര്‍ച്വല്‍ ക്യൂ ദര്‍ശനം ആരംഭിച്ചു

ഗുരുവായൂർ: ഗുരുവായൂർ ക്ഷേത്രത്തിൽ വെർച്വൽ ക്യൂ വഴിയുള്ള ദർശനം തുടങ്ങി. രാവിലെ 7 മുതൽ 8 വരെയുള്ള ആദ്യ സ്ലോട്ടിൽ 148 പേർ ദർശനം നടത്തി. 300 പേർക്കു വരെ ദർശനം നടത്താമെന്നിരിക്കേ, പകുതിയോളം പേരെ ആദ്യ സ്ലോട്ടിൽ എത്തിയുള്ളൂ. പത്തു മിനിറ്റിനകം അവർക്ക് ദർശനം പൂർത്തിയാക്കാനായി. രണ്ടാമത്തെ സ്ലോട്ട് 8 മുതൽ 9 വരെയായിരുന്നു. ആ സമയത്തേക്ക് ബുക്ക് ചെയ്തിരുന്നവരിൽ ആദ്യമെത്തിയവരെ ഏഴരയ്ക്ക് ക്യൂ പന്തലിൽ പ്രവേശിപ്പിച്ചു. സുഖമായ ദർശനം ലഭിച്ചുവെന്ന് ഭക്തർ പറഞ്ഞു. വെർച്വൽ ദർശനത്തിൻ്റെ ഉദ്ഘാടനം ചൊവ്വാഴ്ച രാവിലെ 6.45 ന് ദേവസ്വം ചെയർമാൻ എ.വി. ഗോപിനാഥൻ നിർവ്വഹിച്ചു. മാനേജർമാരായ സി.വി . സന്തോഷ്, എ.വി.പ്രശാന്ത്, സുഭാഷ് എന്നിരും പങ്കെടുത്തു.