പ്രേക്ഷകർക്ക് ഏറെ പ്രിയപ്പെട്ട താരമാണ് സിമ്രാൻ. ബോളിവുഡിലൂടെയാണ് സിമ്രാൻ സിനിമയിൽ അരങ്ങേറ്റം കുറിക്കുന്നത്. പിന്നീട് മലയാളം, തമിഴ്, കന്നഡ, തെലുങ്ക് ചിത്രങ്ങളിലെല്ലാം സിമ്രാൻ സജീവമായിരുന്നു. ഇപ്പോഴിതാ സൗന്ദര്യവർദ്ധക ശസ്ത്രക്രിയയെ കുറിച്ച് സിമ്രാൻ പറഞ്ഞ വാക്കുകളാണ് ചർച്ചയാവുന്നത്. സൗന്ദര്യത്തിനായി മെഡിക്കൽ ട്രീറ്റ്മെന്റുകളെടുക്കുന്നവരെ താൻ കണ്ടിട്ടുണ്ടെന്നും എന്നാൽ തനിക്ക് ഇതെല്ലാം പേടിയാണെന്നും സിമ്രാൻ പറഞ്ഞു. മെഡിറ്റേഷൻ, യോഗ, ജിം, ഡാൻസ് ഇതിൽ ഏതെങ്കിലുമൊക്കെ ചെയ്യൂ എന്നാണ് സിമ്രാൻ പറയുന്നത്.
“ഫില്ലേഴ്സ്, ബോട്ടോക്സ് അങ്ങനെ കുറേ കാര്യങ്ങളുണ്ട്. ഇതെല്ലാം മുഖത്തിന്റെ ഷേപ്പ് തന്നെ മാറ്റിക്കളയും. സൗന്ദര്യത്തിനായി ഇഞ്ചെക്ഷനെടുക്കുന്ന, മെഡിക്കൽ ട്രീറ്റ്മെന്റുകളെടുക്കുന്നവരെയൊക്കെ ഞാൻ കണ്ടിട്ടുണ്ട്. ഇതെല്ലാം എനിക്ക് പേടിയാണ്. ഇതൊന്നും നമ്മുടെ ഭാവിയ്ക്ക് നല്ലതല്ല. അതായത് നമ്മുടെ ആരോഗ്യത്തിന്. ഭാവിയിലെ നമ്മുടെ ആരോഗ്യത്തിന് നല്ലതല്ല ഇത്തരം കാര്യങ്ങളൊന്നും. പറ്റുമെങ്കിൽ ഇത്തരം കാര്യങ്ങൾ ചെയ്യാതിരിക്കുക. മെഡിറ്റേഷൻ, യോഗ, ജിം, ഡാൻസ് ഇതിൽ ഏതെങ്കിലുമൊക്കെ ചെയ്യൂ.” സിമ്രാൻ പറയുന്നു.
“നമ്മൾ സ്വാഭാവികമായി തന്നെ വിയർക്കണം. എന്റെ മുഖത്തിന്റെ ഷേപ്പ് മാറുന്നത് എനിക്ക് ആലോചിക്കാനേ പറ്റില്ല. ട്രീറ്റ്മെന്റുകളൊക്കെയാണെങ്കിൽ ഭയങ്കര ചെലവേറിയതുമാണ്. എനിക്കറിയില്ല, ഭയങ്കര പൈസയാണ് അതിനൊക്കെ. 25,000 രൂപ ഒരു വർഷം ജിമ്മിൽ കൊടുക്കാൻ ഇവർക്കു പറ്റില്ല. എനിക്ക് തോന്നുന്നു 25,000 രൂപയ്ക്ക് മുകളിൽ വരും ഇത്തരത്തിലുള്ള ട്രീറ്റ്മെന്റുകൾക്കൊക്കെ. പക്ഷേ അങ്ങനെ ചെയ്യുന്നവരുണ്ട്. എളുപ്പ വഴികൾ ഒന്നും വർക്ക് ആകില്ല.” സിമ്രാൻ കൂട്ടിച്ചേർത്തു. അടുത്തിടെ ഒരു പോഡ്കാസ്റ്റിലായിരുന്നു സിമ്രാന്റെ പ്രതികരണം.
