എടപ്പാൾ: കെ.എസ്.ആർ.ടി.സി.യുടെ സൂപ്പർ ഫാസ്റ്റ്, ഓർഡിനറി ബസുകളിൽ ടി.വി. സ്ഥാപിക്കുന്നു. 32 ഇഞ്ച് ടി.വി.കളാണ് സ്ഥാപിക്കുന്നത്. ആദ്യഘട്ടത്തിൽ 500 ബസുകളിലാണ് ടി.വി. സ്ഥാപിക്കുന്നത്. പിന്നീട് മറ്റു ബസുകളിലേക്കും വ്യാപിപ്പിക്കും. കോട്ടയം ആസ്ഥാനമായ കമ്പനിക്കാണ് കരാർ. ടി.വി.യിൽ പ്രദർശിപ്പിക്കുന്ന പരസ്യങ്ങളിലൂടെ വരുമാനം കണ്ടെത്തിയാണ് കരാർ കമ്പനി ഇവ സ്ഥാപിച്ച് പ്രവർത്തിപ്പിക്കുക.
ബസ്സിൽ ഡ്രൈവർ സീറ്റിന് പിറകിലായി യാത്രക്കാർക്കെല്ലാം കാണാവുന്ന വിധത്തിൽ മുകളിലായാണ് ടി.വി. സ്ഥാപിക്കുക. ടി.വി.യിൽ വാർത്തയ്ക്കൊപ്പം, ബസ് സഞ്ചരിക്കുന്ന വഴിയി ലെ വിവരങ്ങൾ, എത്തിയ സ്റ്റോപ്പ്, അടുത്ത സ്റ്റോപ്പ്, ബസ് സമയം, കെ.എസ്.ആർ.ടി.സി.യെക്കുറിച്ചുള്ള മറ്റു വിവരങ്ങൾ എന്നിവയെല്ലാം അറിയാം.
കെ.എസ്.ആർ.ടി.സി.ക്ക് സാമ്പത്തിക ബാധ്യതയില്ലാതെ ടി.വി. സ്ഥാപിക്കുന്നതും പ്രവർത്തിപ്പിക്കുന്നതുമടക്കം എല്ലാം കരാറെടുത്ത കമ്പനി ചെയ്യുംവിധമാണ് പദ്ധതിയെന്നാണ് സൂചന. പ്രതിമാസം ലഭിക്കുന്ന വരുമാനത്തിന്റെ നിശ്ചിതശതമാനം തുക ലൈസൻസ് ഫീസായി കെ.എസ്.ആർ.ടി.സി.ക്ക് നൽകുകയുംചെയ്യും. വീഡിയോ അടക്കമുള്ളവ കോർപ്പറേഷന്റെ അംഗീകാരത്തോടെ മാത്രമേ പ്രദർശിപ്പിക്കാൻ അനുവാദമുള്ളൂ.
