നിയന്ത്രണം വിട്ട മിനി ലോറി പാലത്തിന്റെ കൈവരിയിലേക്ക് ഇടിച്ചുകയറി

കൊച്ചി: ഇടപ്പള്ളി – അരൂർ ദേശീയ പാതയിൽ തൈക്കൂടത്ത് നിയന്ത്രണം വിട്ട ലോറി പാലത്തിന്റെ കൈവരിയിൽ ഇടിച്ചു കയറി. ഇന്ന് പുലർച്ചെ 5:30 ഓടെ ആയിരുന്നു അപകടം. അപകടത്തിൽപ്പെട്ട പാഴ്‌സൽ ലോറി മണിക്കൂറുകളോളം കൈവരിക്ക് താഴെ തൂങ്ങി കിടന്നു. ഡ്രൈവറടക്കം രണ്ടുപേരായിരുന്നു ലോറിയിൽ ഉണ്ടായിരുന്നത്. ഇരുവർക്കും ലോറിയിൽ നിന്ന് പാളത്തിലേക്ക് ഊർന്നിറങ്ങാൻ കഴിഞ്ഞത് ആശ്വാസമായി. വൈറ്റില ഭാഗത്തുനിന്നും അരൂർ ഭാഗത്തേക്ക് പോവുന്ന ദിശയിലാണു അപകടം. ലോറിയുടെ മുൻവശത്തെ ടയർ പാലത്തിന്റെ കൈവരി തകർത്ത് പുഴയിലേക്ക് വീഴുന്ന രീതിയിലായിരുന്നു. രാവിലെ ഒൻപതുമണിയോടെയാണ് ക്രെയിൻ എത്തിച്ച് ലോറി നീക്കം ചെയ്യാൻ കഴിഞ്ഞത്. നിലമ്പൂരിൽ നിന്നുള്ള മിനി പാഴ്‌സൽ ലോറി ചേർത്തലയിലേക്ക് പോവുകയായിരുന്നു. ഇതിനൊപ്പം പാലത്തോട് ചേർന്നുള്ള പൈപ്പ് ലൈൻ പുഴയിലേക്ക് പൊട്ടി വീണതോടെ ചമ്പകര കനാലിലും ഗതാഗത തടസ്സം നേരിട്ടു.