തിരുവനന്തപുരം: ദസറ, പൂജ ഉത്സവങ്ങളോടനുബന്ധിച്ചുള്ള യാത്രക്കാരുടെ തിരക്ക് കണക്കിലെടുത്ത് രണ്ട് പ്രത്യേക എക്സ്പ്രസ് ട്രെയിനുകൾ പ്രഖ്യാപിച്ച് റെയിൽവേ. തിരുവനന്തപുരം നോർത്ത്–സാന്ത്രാഗച്ചി, ബെംഗളൂരു കന്റോൺമെന്റ്–തിരുവനന്തപുരം നോർത്ത് റൂട്ടുകളിലാണ് പ്രത്യേക സർവീസുകൾ നടത്തുക. ട്രെയിനുകളിലേക്കുള്ള ടിക്കറ്റ് റിസർവേഷൻ നാളെ രാവിലെ എട്ട് മണി മുതൽ ആരംഭിക്കും.

തിരുവനന്തപുരം–സാന്ത്രാഗച്ചി സ്പെഷ്യൽ

ട്രെയിൻ നമ്പർ 06105 തിരുവനന്തപുരം നോർത്ത്–സാന്ത്രാഗച്ചി എക്സ്പ്രസ് സ്പെഷ്യൽ ഒക്ടോബർ 15 വ്യാഴാഴ്ച ഉച്ചയ്ക്ക് 2.15ന് തിരുവനന്തപുരം നോർത്തിൽ നിന്ന് പുറപ്പെടും. മൂന്നാം ദിവസം ഉച്ചയ്ക്ക് 1.45ന് സാന്ത്രാഗച്ചിയിൽ എത്തിച്ചേരും.

മടക്കയാത്രയ്ക്കുള്ള ട്രെയിൻ നമ്പർ 06106 സാന്ത്രാഗച്ചി–തിരുവനന്തപുരം നോർത്ത് എക്സ്പ്രസ് സ്പെഷ്യൽ ഒക്ടോബർ 18 ഞായറാഴ്ച ഉച്ചയ്ക്ക് 2.15ന് സാന്ത്രാഗച്ചിയിൽ നിന്ന് പുറപ്പെട്ട് മൂന്നാം ദിവസം രാവിലെ 9.55ന് തിരുവനന്തപുരം നോർത്തിൽ എത്തും.

നാല് സ്ലീപ്പർ ക്ലാസ് കോച്ചുകൾ, 14 ജനറൽ സെക്കൻഡ് ക്ലാസ് കോച്ചുകൾ, ഭിന്നശേഷി സൗഹൃദമായ രണ്ട് സെക്കൻഡ് ക്ലാസ് കോച്ചുകൾ എന്നിവയാണ് ഈ ട്രെയിനിലുണ്ടാകുക. ഇരുദിശകളിലേക്കും ഓരോ സർവീസ് വീതമാണ് നടത്തുന്നത്.

ബെംഗളൂരു–തിരുവനന്തപുരം സ്പെഷ്യൽ

ട്രെയിൻ നമ്പർ 06575 ബെംഗളൂരു കന്റോൺമെന്റ്–തിരുവനന്തപുരം നോർത്ത് എക്സ്പ്രസ് സ്പെഷ്യൽ ഒക്ടോബർ 16 വെള്ളിയാഴ്ച വൈകിട്ട് 4.40ന് ബെംഗളൂരു കന്റോൺമെന്റിൽ നിന്ന് പുറപ്പെടും. അടുത്ത ദിവസം രാവിലെ 10.30ന് തിരുവനന്തപുരം നോർത്തിൽ എത്തിച്ചേരും.

മടക്കയാത്രയ്ക്കുള്ള ട്രെയിൻ നമ്പർ 06576 തിരുവനന്തപുരം നോർത്ത്–ബെംഗളൂരു കന്റോൺമെന്റ് എക്സ്പ്രസ് സ്പെഷ്യൽ ഒക്ടോബർ 17 ശനിയാഴ്ച ഉച്ചയ്ക്ക് 12.40ന് തിരുവനന്തപുരം നോർത്തിൽ നിന്ന് പുറപ്പെട്ട് അടുത്ത ദിവസം രാവിലെ ആറിന് ബെംഗളൂരു കന്റോൺമെന്റിൽ എത്തും.

നാല് എസി ത്രീ ടയർ കോച്ചുകൾ, ആറ് സ്ലീപ്പർ ക്ലാസ് കോച്ചുകൾ, എട്ട് ജനറൽ സെക്കൻഡ് ക്ലാസ് കോച്ചുകൾ, രണ്ട് ലഗേജ് കം ബ്രേക്ക് വാനുകൾ എന്നിവയാണ് ഈ ട്രെയിനിലുണ്ടാകുക. ഈ റൂട്ടിലും ഇരുദിശകളിലേക്കും ഓരോ സർവീസ് വീതമാണ് ക്രമീകരിച്ചിരിക്കുന്നത്.

രണ്ട് പ്രത്യേക ട്രെയിനുകളിലേക്കുമുള്ള ടിക്കറ്റ് ബുക്കിങ് നാളെ രാവിലെ എട്ട് മണി മുതൽ ആരംഭിക്കും.