ഡൽഹി : മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ അന്വേഷണത്തിൽ നിർണായക വഴിത്തിരിവ്. മലേഷ്യൻ കമ്പനിയുടെ പ്രോജക്ട് മാനേജറായിരുന്ന ലീയുടെ ആത്മഹത്യയുമായി ബന്ധപ്പെട്ട കേസിൽ ഗ്യാനേഷ് കുമാറിനെതിരെ മൊഴി നൽകാൻ തയ്യാറാണെന്ന് ലീയുടെ സുഹൃത്ത് സർക്കാരിനെയും വിജിലൻസിനെയും അറിയിച്ചതായാണ് വിവരം. ഗ്യാനേഷ് കുമാർ ലീയെ മാനസികമായി പീഡിപ്പിച്ചിരുന്നുവെന്നാണ് സുഹൃത്തിന്റെ ആരോപണം.
ബെൽ കമ്പനിയുടെ മുൻ ജീവനക്കാരനാണ് ഗ്യാനേഷ് കുമാറിനെതിരെ മൊഴി നൽകാൻ സന്നദ്ധത അറിയിച്ചിരിക്കുന്നത്. ലീ ജോലി ചെയ്തിരുന്ന മലേഷ്യൻ കമ്പനിക്കൊപ്പം കെഎസ്ടിപി കരാർ ഏറ്റെടുത്ത കമ്പനിയാണ് ബെൽ.
ഗ്യാനേഷ് കുമാറിനെതിരായ വിജിലൻസ് അന്വേഷണത്തിന് പുറമെ ക്രൈംബ്രാഞ്ചും കേസെടുത്തേക്കുമെന്നാണ് സൂചന. കേസുമായി ബന്ധപ്പെട്ട് പുതിയ തെളിവുകൾ ശേഖരിക്കാനാണ് നീക്കം. ലീയുടെ ആത്മഹത്യയുമായി ബന്ധപ്പെട്ട സംഭവത്തിലും കൂടുതൽ അന്വേഷണം നടത്തും. ഇതിന്റെ ഭാഗമായി മലേഷ്യയിലെത്തി ലീയുടെ ബന്ധുക്കളെ കാണാനും വിവരങ്ങൾ ശേഖരിക്കാനും അന്വേഷണസംഘം ശ്രമം നടത്തും.
അതേസമയം, ഗ്യാനേഷ് കുമാറിനെതിരെ നേരത്തെ നടന്ന വിജിലൻസ് അന്വേഷണങ്ങൾ പരിശോധിച്ച പോലീസ് സൂപ്രണ്ടുമാർ ഇന്ന് വിജിലൻസ് ഡയറക്ടർക്ക് റിപ്പോർട്ട് നൽകും. ഈ റിപ്പോർട്ടിന്റെ അടിസ്ഥാനത്തിൽ തുടർനടപടികൾ സംബന്ധിച്ച തീരുമാനമുണ്ടാകുമെന്നാണ് പ്രതീക്ഷിക്കുന്നത്.
