BA തോറ്റു, MA പാസായി

കൊച്ചി: ബിരുദം തോറ്റിട്ടും ബിരുദാനന്തര ബിരുദം പാസായി! കാലടി ശ്രീശങ്കരാചാര്യ സംസ്കൃത സർവകലാശാലയിലാണ് എല്ലാവരെയും അമ്പരപ്പിക്കുന്ന ഈ സംഭവം നടന്നത്. സർവകലാശാലയുടെ തുറവൂർ പ്രാദേശിക കേന്ദ്രത്തിൽ 2014 മുതൽ 2017 വരെ ബിഎ സംസ്കൃതം സാഹിത്യം പഠിച്ച വിദ്യാർത്ഥിനി കോഴ്സ് പാസായിരുന്നില്ല. എന്നാൽ അതേ വർഷം തന്നെ, അതേ കേന്ദ്രത്തിൽ എംഎ കോഴ്സിന് പ്രവേശനം നേടി.

2019ൽ എംഎ പാസാകുകയും സർട്ടിഫിക്കറ്റും മാർക്ക് ലിസ്റ്റും കൈപ്പറ്റുകയും ചെയ്തു. പിന്നീട് ബിരുദ സർട്ടിഫിക്കറ്റ് വാങ്ങാനായി സർവകലാശാലയിൽ എത്തിയപ്പോഴാണ് ഈ വിവരം പരീക്ഷാ വിഭാഗത്തിന്റെ ശ്രദ്ധയിൽപ്പെട്ടത്. ഈ വർഷം സെപ്റ്റംബറിൽ ബിഎ അഞ്ചാം സെമസ്റ്ററിലെ വിഷയങ്ങൾക്ക് പുനർമൂല്യനിർണയത്തിനും വിദ്യാർത്ഥിനി അപേക്ഷിച്ചിട്ടുണ്ട്. സർക്കാർ ഓഡിറ്റ് വിഭാഗത്തിന്റെ റിപ്പോർട്ടിലാണ് സംഭവം പുറത്തുവന്നത്.

ബിരുദം പൂർത്തിയാക്കാത്ത വിദ്യാർത്ഥിക്ക് ഏത് മാനദണ്ഡപ്രകാരമാണ് എംഎയ്ക്ക് പ്രവേശനം നൽകിയതെന്നാണ് ഓഡിറ്റ് വിഭാഗം സർവകലാശാലയോട് വിശദീകരണം തേടിയിരിക്കുന്നത്. പ്രവേശന നടപടികളിൽ വീഴ്ചയുണ്ടായോ എന്നതടക്കമുള്ള കാര്യങ്ങളും ഇനി പരിശോധിക്കേണ്ടതുണ്ട്. സർവകലാശാലയുടെ ഭാഗത്തുനിന്നുള്ള വിശദീകരണവും തുടർനടപടികളും എന്തായിരിക്കുമെന്നാണ് ഇനി അറിയേണ്ടത്. ഒരു വിദ്യാർത്ഥിനിക്ക് ബിഎ പാസാകാതെ എംഎ സർട്ടിഫിക്കറ്റ് ലഭിച്ച സംഭവം ഉന്നതവിദ്യാഭ്യാസ മേഖലയിലെ പ്രവേശന നടപടികളെക്കുറിച്ചും ചോദ്യങ്ങൾ ഉയർത്തുകയാണ്.

Leave a Reply

Your email address will not be published. Required fields are marked *