പത്തനംത്തിട്ട: ശബരിമലയിൽ വെർച്വൽ ക്യൂ ബുക്കിംഗുമായി ബന്ധപ്പെട്ട് നിർണായക നടപടിക്കൊരുങ്ങി അധികൃതർ, അന്യസംസ്ഥാന ട്രാവൽ ഏജൻസികൾ തീർഥാടകരുടെ തിരിച്ചറിയൽ രേഖകൾ ശേഖരിച്ച് കൂട്ടത്തോടെ സ്ലോട്ടുകൾ ബുക്ക് ചെയ്യുന്നതായാണ് പൊലീസിന്റെ കണ്ടെത്തൽ. ഇങ്ങനെ ബുക്ക് ചെയ്യുന്ന കൂപ്പണുകൾ പ്രിന്റ് എടുത്ത് തീർഥാടകർക്ക് വിൽക്കുന്നതായും റിപ്പോർട്ടുകളുണ്ട്.
ഇതോടെ മാസ് ബുക്കിംഗ് സംവിധാനം നിർത്തലാക്കി ബുക്കിംഗ് രീതി പരിഷ്കരിക്കണമെന്ന നിർദേശവുമായി പൊലീസ് ദേവസ്വം ബോർഡിന് റിപ്പോർട്ട് നൽകും. അതേസമയം, ശബരിമലയിൽ ഭക്തജനത്തിരക്ക് തുടരുകയാണ്. ഈ മാസം 30 വരെ അധികമായി 5,000 പേർക്ക് വെർച്വൽ ക്യൂ വഴി ദർശനത്തിന് ബുക്ക് ചെയ്യാം. സ്പോട്ട് ബുക്കിംഗ് എണ്ണവും വർധിപ്പിക്കും.
തീർഥാടകർക്ക് ആവശ്യമായ യാത്രാ വിവരങ്ങളും ഇടത്താവളങ്ങളിലെ സൗകര്യങ്ങളും അറിയാൻ ‘ശരൺ’ ആപ്പും നിലവിൽ വന്നിട്ടുണ്ട്. യാത്രയ്ക്കിടെ ലഭ്യമായ അടിസ്ഥാന സൗകര്യങ്ങൾ, പ്രാദേശിക അറിയിപ്പുകൾ എന്നിവയും ആപ്പിലൂടെ അറിയാം. തിരക്ക് നിയന്ത്രിക്കാനും ഭക്തർക്ക് സുഗമമായ ദർശനം ഉറപ്പാക്കാനുമാണ് പുതിയ ക്രമീകരണങ്ങൾ ലക്ഷ്യമിടുന്നത്. ബുക്കിംഗ് സംവിധാനത്തിലെ മാറ്റങ്ങൾ നടപ്പിലായാൽ തീർഥാടകർക്ക് എങ്ങനെ പ്രയോജനം ലഭിക്കുമെന്നതും ശ്രദ്ധേയമാണ്.
