അബൂദബി: ഇന്ത്യക്കാർക്കായി അബൂദബി പ്രഖ്യാപിച്ച സൗജന്യ ടൂറിസം വിസയിൽ ട്രാവൽ പാർട്ണർമാരുടെ പട്ടിക പുറത്തുവിട്ടു. സാംസ്കാരിക-വിനോദസഞ്ചാര വകുപ്പാണ് പട്ടിക പുറത്തുവിട്ടത്. 11 ഏജൻസികളെയാണ് പാർട്ണർമാരിൽ ഉൾപ്പെടുത്തിയിട്ടുള്ളത്. അക്ബർ ട്രാവൽസ്, റിയ ട്രാവൽസ്, ഹോളിഡേ ട്രൈബ്, മേക്ക് മൈ ട്രിപ്പ്, തോമസ് കുക്ക് ആൻഡ് എസ്.ഒ.ടി.സി, ത്രില്ലോഫിലിയ, ഉട്ടാസ്സോ.കോം, കേസരി ടൂർസ്, റോയൽ ടൂർസ്, പിക്ക് യുവർ ട്രയിൽ, ആര്യൻ ലെയ്ഷർ എന്നീ സ്ഥാപനങ്ങളെയാണ് ട്രാവൽ പാർട്ണർമാരായി തെരഞ്ഞെടുത്തത്. 2026 ആഗസ്റ്റ് 1 മുതൽ ഒക്ടോബർ 31 വരെയുള്ള കാലയളവിൽ താമസിക്കുന്നവർക്കായാണ് സൗജന്യ ടൂറിസം വിസ പ്രഖ്യാപിച്ചിട്ടുളളത്. മൂന്ന് രാത്രി അബൂദബിയിലെ ഹോട്ടലിൽ താമസിക്കുന്നവർക്കാണ് ആനുകൂല്യം ലഭിക്കുക. ട്രാവൽ പാർട്ണർമാർ വഴി ഹോളിഡേ പാക്കേജ് ബുക്ക് ചെയ്യാം. 285 ദിർഹം (ഏകദേശം 7400 രൂപ) വരുന്ന 30 ദിവസം കാലാവധിയുള്ള വിസയാണ് ലഭിക്കുക.
ഇന്ത്യയിൽ നിന്നുള്ള റിട്ടേൺ ഫ്ലൈറ്റും അബൂദബിയിലെ താമസവും ഉൾപ്പെടുന്ന പാക്കേജ് അംഗീകൃത ട്രാവൽ പാർട്ണർമാർ വഴിയോ ഓൺലൈൻ ട്രാവൽ ഏജൻസികൾ വഴിയോ ബുക്ക് ചെയ്യണം. സൗജന്യമായി ലഭിക്കുന്ന വിസയ്ക്ക് 30 ദിവസത്തെ കാലാവധിയുണ്ടാകും. ആദ്യം ബുക്ക് ചെയ്യുന്ന 20,000 പേർക്കാണ് ഈ ആനുകൂല്യം പ്രഖ്യാപിച്ചിട്ടുളളത്.
