ക്രൈസ്റ്റ്ചര്‍ച്ച്: ഇന്ത്യയ്ക്കെതിരായ ആദ്യ ടി20 മത്സരത്തിലെ തോല്‍വിക്ക് പിന്നാലെ, ഇന്ത്യന്‍ ഓപ്പണര്‍മാരായ സഞ്ജു സാംസണെയും അഭിഷേക് ശര്‍മ്മയെയും പ്രശംസിച്ച് ന്യൂസിലന്‍ഡ് താരം ഗ്ലെന്‍ ഫിലിപ്‌സ്. ഇരുവരും ബാറ്റ് ചെയ്യുമ്പോള്‍ പിഴവുകള്‍ വരുത്താന്‍ യാതൊരു സാധ്യതയുമില്ലെന്നും, അവര്‍ക്കെതിരെ പന്തെറിയുമ്പോള്‍ ‘സാധ്യമായ എല്ലാ പ്ലാനുകളും കയ്യില്‍ കരുതേണ്ടി വരുമെന്നുമാണ് ഫിലിപ്‌സ് പറഞ്ഞത്.
”സഞ്ജുവും അഭിഷേകും കളിക്കുന്ന രീതി കാണുമ്പോള്‍ ലൈനും ലെങ്തും കണ്ടെത്തുക എന്നത് വളരെ പ്രയാസമുള്ള കാര്യമാണ്. ആദ്യ 6 ഓവറില്‍ അവര്‍ 96 റണ്‍സ് അടിച്ചുകൂട്ടിയിട്ടും മത്സരത്തിലേക്ക് തിരിച്ചുവരാനും, അവസാന ഓവര്‍ വരെ കളി എത്തിക്കാനും ഞങ്ങള്‍ക്ക് സാധിച്ചു. ഒന്‍പതാം നമ്പര്‍ വരെ ബാറ്റ് ചെയ്യുന്ന ഒരു ടീമിനെതിരെ അത് വലിയൊരു കാര്യമാണ്. എന്നാല്‍ അവസാന നിമിഷം നമന്‍ ധീര്‍ മികച്ച രീതിയില്‍ ബാറ്റ് ചെയ്ത് വിജയം ഞങ്ങളില്‍ നിന്ന് തട്ടിയെടുക്കുകയായിരുന്നു.” ഫിലിപ്‌സ് പറഞ്ഞു.
സഞ്ജു സാംസണിന്റെയും അഭിഷേക് ശര്‍മ്മയുടെയും വെടിക്കെട്ട് തുടക്കത്തിന്റെയും, നമന്‍ ധിറിന്റെ തകര്‍പ്പന്‍ ഫിനിഷിംഗിന്റെയും കരുത്തിലാണ് ക്രൈസ്റ്റ്ചര്‍ച്ചില്‍ നടന്ന മത്സരത്തില്‍ 226 റണ്‍സ് പിന്തുടര്‍ന്ന് ഇന്ത്യ ചരിത്ര വിജയം നേടിയത്. മത്സരത്തില്‍ സഞ്ജു സാംസണ്‍ ടോപ്പ് സ്‌കോററായപ്പോള്‍, പുതിയ ഫിനിഷറുടെ റോളിലെത്തിയ നമന്‍ ധിര്‍ തിളങ്ങി. ടി20യില്‍ ഇതുവരെ 39 ഇന്നിംഗ്‌സുകളില്‍ നിന്ന് 31.23 ശരാശരിയില്‍ 1,218 റണ്‍സാണ് സഞ്ജു – അഭിഷേക് സഖ്യം കൂട്ടിച്ചേര്‍ത്തത്. ഒരു സെഞ്ചുറി കൂട്ടുകെട്ടും ഏഴ് അര്‍ദ്ധസെഞ്ചുറി കൂട്ടുകെട്ടുകളും ഇതില്‍ ഉള്‍പ്പെടുന്നു.
