പുതുച്ചേരി: സാംസ്കാരിക ആഘോഷങ്ങളിലൂടെ വിനോദസഞ്ചാര മേഖലയ്ക്ക് കൂടുതൽ കരുത്തുപകരാൻ ലക്ഷ്യമിട്ട് സംഘടിപ്പിക്കുന്ന ‘പോണ്ടി മെലാഞ്ച് 2027’ന്റെ ഔദ്യോഗിക ലോഗോയും ചിഹ്നവും പ്രകാശനം ചെയ്തു. രാജ്യത്തിന്റെ വിവിധ ഭാഗങ്ങളിൽനിന്നും വിദേശത്തുനിന്നും കൂടുതൽ സഞ്ചാരികളെ ആകർഷിച്ച് പുതുച്ചേരിയെ പ്രമുഖ അന്താരാഷ്ട്ര വിനോദസഞ്ചാര കേന്ദ്രമായി ഉയർത്തുകയാണ് പരിപാടിയുടെ ലക്ഷ്യമെന്ന് മുഖ്യമന്ത്രി എൻ. രംഗസാമി പറഞ്ഞു.
വെള്ളിയാഴ്ച പുതുച്ചേരിയിലെ ഗാന്ധി തിടലിൽ നടന്ന ചടങ്ങിൽ മുഖ്യമന്ത്രി ലോഗോയും ചിഹ്നവും അനാവരണം ചെയ്തു. പുതുച്ചേരി ടൂറിസം വകുപ്പും ടെക്‌ഷോട്ടും (TEKSHOT) സംയുക്തമായാണ് പരിപാടി സംഘടിപ്പിക്കുന്നത്. ചടങ്ങിൽ ടൂറിസം, സിവിൽ ഏവിയേഷൻ മന്ത്രി മല്ലാടി കൃഷ്ണ റാവു പരിപാടിയുടെ ആശയവും വരാനിരിക്കുന്ന ആഘോഷങ്ങളും പരിചയപ്പെടുത്തുന്ന പ്രമോഷണൽ വീഡിയോ പുറത്തിറക്കി.
‘സംസ്കാരം, സർഗാത്മകത, ആഘോഷം’ എന്ന പ്രമേയത്തിൽ സംഘടിപ്പിക്കുന്ന പോണ്ടി മെലാഞ്ച് 2027ൽ കല, സംഗീതം, ഫാഷൻ, ഭക്ഷണം, ആരോഗ്യപരിപാലനം, പൈതൃകം, വിനോദം തുടങ്ങിയ മേഖലകൾക്ക് പ്രാധാന്യം നൽകും. പുതുച്ചേരിയുടെ സാംസ്കാരിക വൈവിധ്യം ലോകത്തിന് മുന്നിൽ അവതരിപ്പിക്കുന്നതിനൊപ്പം വിനോദസഞ്ചാര മേഖലയിലെ വളർച്ചയ്ക്കും പരിപാടി സഹായകമാകുമെന്നാണ് പ്രതീക്ഷ.
2027 ജനുവരിയിൽ വിദ്യാഭ്യാസം, ആത്മീയത, ആരോഗ്യപരിപാലനം എന്നീ വിഷയങ്ങളിൽ വിവിധ സമ്മേളനങ്ങൾ സംഘടിപ്പിക്കും. വിവിധ മേഖലകളിലെ പ്രമുഖ വ്യക്തികൾ, പ്രൊഫഷണലുകൾ, വിദഗ്ധർ, പ്രതിനിധികൾ എന്നിവർ പങ്കെടുക്കുന്ന സമ്മേളനങ്ങൾ വിജ്ഞാനവിനിമയത്തിനും ആശയചർച്ചകൾക്കും വേദിയാകും. ഇതിന് പിന്നാലെ ഫെബ്രുവരിയിൽ സംഗീത പരിപാടികളും അന്താരാഷ്ട്ര നൃത്താവതരണങ്ങളും ഉൾപ്പെടെയുള്ള വിനോദപരിപാടികളും അരങ്ങേറും.
പുതുച്ചേരിയുടെ വിവിധ ഭാഗങ്ങളിലായി പരിപാടികൾ സംഘടിപ്പിക്കാനാണ് പദ്ധതിയെന്ന് മുഖ്യമന്ത്രി പറഞ്ഞു. സാംസ്കാരിക, വിനോദ പരിപാടികൾ കൂടുതൽ സഞ്ചാരികളെ ആകർഷിക്കുമെന്നും പ്രദേശവാസികൾക്കും സന്ദർശകർക്കും ഒരുപോലെ ആസ്വദിക്കാവുന്ന അനുഭവങ്ങൾ ഒരുക്കുമെന്നും അദ്ദേഹം വ്യക്തമാക്കി. പോണ്ടി മെലാഞ്ച് 2027 വിജയകരമാക്കാൻ സർക്കാരിന്റെ പൂർണ പിന്തുണയുണ്ടാകുമെന്നും മുഖ്യമന്ത്രി ഉറപ്പുനൽകി.
സമ്മേളനങ്ങൾ, സാംസ്കാരിക ആഘോഷങ്ങൾ, വിനോദപരിപാടികൾ എന്നിവയിലൂടെ പുതുച്ചേരിയുടെ തനതായ സാംസ്കാരിക സ്വത്വം കൂടുതൽ ജനങ്ങളിലേക്ക് എത്തിക്കാനും ആഗോള വിനോദസഞ്ചാര ഭൂപടത്തിൽ പുതുച്ചേരിയുടെ സ്ഥാനം ശക്തിപ്പെടുത്താനുമാണ് പോണ്ടി മെലാഞ്ച് 2027 ലക്ഷ്യമിടുന്നത്. ഉദ്ഘാടനച്ചടങ്ങിന്റെ ഭാഗമായി വിവിധ സാംസ്കാരിക പരിപാടികളും അരങ്ങേറി.
