കണ്ണൂർ: കണ്ണൂർ ജില്ലാ പഞ്ചായത്തിലെ ക്രമക്കേടുകളുമായി ബന്ധപ്പെട്ട് സിപിഎം നേതാവ് പി.പി. ദിവ്യക്കെതിരെ വിജിലൻസ് അന്വേഷണത്തിന് സർക്കാർ ഉത്തരവിട്ടതിൽ പ്രതികരിച്ച് പരാതിക്കാരനും കെഎസ്‌യു സംസ്ഥാന വൈസ് പ്രസിഡന്റുമായ മുഹമ്മദ് ഷമ്മാസ്. അന്വേഷണത്തിലൂടെ സത്യം പുറത്തുവരുമെന്നാണ് പ്രതീക്ഷയെന്ന് ഷമ്മാസ് പറഞ്ഞു. ദിവ്യ കോടിക്കണക്കിന് രൂപയുടെ ബിനാമി ഇടപാടുകൾ നടത്തിയെന്നാണ് ആരോപണം. ദിവ്യയെ സംരക്ഷിക്കുന്ന നിലപാടാണ് എൽഡിഎഫ് സർക്കാർ സ്വീകരിക്കുന്നതെന്നും ഷമ്മാസ് കുറ്റപ്പെടുത്തി.

പി.പി. ദിവ്യ കണ്ണൂർ ജില്ലാ പഞ്ചായത്ത് പ്രസിഡന്റായിരിക്കെ നടന്നതായി ആരോപിക്കപ്പെടുന്ന സാമ്പത്തിക ക്രമക്കേടുകളിലാണ് വിജിലൻസ് അന്വേഷണം പ്രഖ്യാപിച്ചത്. ടെൻഡർ നടപടികളില്ലാതെ കാർട്ടൺ ഇന്ത്യ കമ്പനിക്ക് നിർമാണ കരാർ നൽകിയെന്നും സ്ഥാപനം ദിവ്യയുടെ ബിനാമിയുടേതാണെന്നുമാണ് പരാതിയിലെ ആരോപണം. ദിവ്യയുടെയും ഭർത്താവിന്റെയും സ്വത്തുവിവരങ്ങളും അന്വേഷണത്തിന്റെ പരിധിയിൽ വരും. ജില്ലാ പഞ്ചായത്ത് മുൻ സെക്രട്ടറി അബ്ദുൽ ലത്തീഫിനെതിരെയും അന്വേഷണം നടത്തും.

കെഎസ്‌യു സംസ്ഥാന വൈസ് പ്രസിഡന്റ് മുഹമ്മദ് ഷമ്മാസ് നൽകിയ പരാതിയുടെ അടിസ്ഥാനത്തിലാണ് അഴിമതി നിരോധന നിയമത്തിലെ 17(എ) വകുപ്പ് പ്രകാരം അന്വേഷണത്തിന് സർക്കാർ അനുമതി നൽകിയത്. മുൻ സർക്കാരിന്റെ കാലത്ത് പരാതിയിൽ അന്വേഷണം നടത്താൻ അനുമതി ലഭിച്ചിരുന്നില്ലെന്നാണ് വിവരം.

അതേസമയം, വിജിലൻസ് അന്വേഷണത്തെ സ്വാഗതം ചെയ്യുന്നതായി പി.പി. ദിവ്യ പ്രതികരിച്ചു. അന്വേഷണവുമായി പൂർണമായി സഹകരിക്കുമെന്നും അപവാദങ്ങൾക്ക് മുന്നിൽ തലകുനിക്കില്ലെന്നും ദിവ്യ ഫേസ്ബുക്ക് കുറിപ്പിൽ വ്യക്തമാക്കി.

ജില്ലാ പഞ്ചായത്തിലെ പദ്ധതികളെല്ലാം ഇ-ടെൻഡർ സംവിധാനത്തിലൂടെ സുതാര്യമായാണ് നടപ്പാക്കിയതെന്നാണ് ദിവ്യയുടെ വിശദീകരണം. 25 കോടിയുടെ അഴിമതിയെന്നതുൾപ്പെടെയുള്ള ആരോപണങ്ങൾ കേട്ടപ്പോൾ ബോധം പോയില്ലെന്നേയുള്ളൂവെന്നും കണക്കുകളില്ലാത്ത ആരോപണങ്ങൾ ആവർത്തിച്ചതുകൊണ്ട് അവ സത്യമാകില്ലെന്നും ദിവ്യ കുറിച്ചു. അന്വേഷണം നടക്കട്ടെയെന്നും ആരോപണങ്ങൾക്ക് മറുപടി പറയേണ്ടത് അന്വേഷണവും തെളിവുകളുമാണെന്നും അവർ വ്യക്തമാക്കി.

വിജിലൻസ് അന്വേഷണം ആരംഭിക്കുന്നതോടെ പരാതിയിൽ ഉന്നയിച്ച ആരോപണങ്ങളുടെ വസ്തുതകൾ പരിശോധിക്കപ്പെടും. ആരോപണങ്ങൾ തെളിയിക്കപ്പെട്ടതായി ഇതുവരെ സ്ഥിരീകരിച്ചിട്ടില്ല. അന്വേഷണത്തിലെ കണ്ടെത്തലുകളാകും തുടർനടപടികളിൽ നിർണായകമാകുക.