ബംഗളൂരു: കേരള പ്രതിപക്ഷ നേതാവ് വി.ഡി. സതീശനെയും തന്നെയും ലക്ഷ്യമിട്ട് മെറ്റാ സ്മാർട്ട് ഗ്ലാസ് ഉപയോഗിച്ച് ഒളിക്യാമറ ഓപ്പറേഷന് ശ്രമം നടന്നതായി കർണാടക ഉപമുഖ്യമന്ത്രി ഡി.കെ. ശിവകുമാർ. തന്നെ കാണാനെത്തിയ ഒരു വ്യവസായി രഹസ്യമായി ദൃശ്യങ്ങൾ പകർത്താൻ കഴിയുന്ന സ്മാർട്ട് ഗ്ലാസ് ധരിച്ചിരുന്നതായി സ്വകാര്യ ടിവി ചാനലിന് നൽകിയ അഭിമുഖത്തിലാണ് ശിവകുമാറിന്റെ വെളിപ്പെടുത്തൽ.
കോൺഗ്രസ് നേതാക്കളെ മാത്രം ലക്ഷ്യമിട്ടുള്ള ആസൂത്രിത നീക്കമാണിതെന്നും ബിജെപി, എൻഡിഎ നേതാക്കളെ സന്ദർശിച്ചപ്പോൾ വ്യവസായി ഈ കണ്ണട ധരിച്ചിരുന്നില്ലെന്നും അദ്ദേഹം ആരോപിച്ചു. എന്നാൽ, സന്ദർശകന്റെ പേരോ ഒളിക്യാമറ ഉപയോഗിച്ചതിന് തെളിവുകളോ ശിവകുമാർ പുറത്തുവിട്ടിട്ടില്ല.
ഉദ്യോഗസ്ഥർ മുഖേന മുൻകൂട്ടി അനുമതി വാങ്ങിയാണ് വ്യവസായി തന്നെ കാണാനെത്തിയതെന്ന് ശിവകുമാർ പറഞ്ഞു. ബിസിനസ് ചർച്ചയായി തുടങ്ങിയ സംഭാഷണം പിന്നീട് രാഷ്ട്രീയ വിഷയങ്ങളിലേക്കും ബൂത്തുതല തന്ത്രങ്ങളിലേക്കും മാറിയതോടെയാണ് കണ്ണടയിൽ സംശയം തോന്നിയത്. തുടർന്ന് സന്ദർശകനെക്കുറിച്ച് രഹസ്യമായി അന്വേഷിക്കാൻ ഉദ്യോഗസ്ഥർക്ക് നിർദേശം നൽകിയെന്നും അദ്ദേഹം വ്യക്തമാക്കി.
വി.ഡി. സതീശനുമായി കൂടിക്കാഴ്ച നടത്തിയപ്പോഴും വ്യവസായി ഇതേ സ്മാർട്ട് ഗ്ലാസ് ധരിച്ചിരുന്നതായി വിവരം ലഭിച്ചെന്നും ശിവകുമാർ അവകാശപ്പെട്ടു. എന്നാൽ ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു, മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, ഒരു കേന്ദ്രമന്ത്രി എന്നിവരെ സന്ദർശിച്ചപ്പോൾ കണ്ണട ധരിച്ചിരുന്നില്ലെന്നും അദ്ദേഹം ആരോപിച്ചു.
കോൺഗ്രസ് നേതാക്കളെ കെണിയിൽപ്പെടുത്താനുള്ള വലിയ നീക്കത്തിന്റെ ഭാഗമായാണ് സംഭവത്തെ കാണുന്നതെന്നും ശിവകുമാർ പറഞ്ഞു. പേഴ്സണൽ അസിസ്റ്റന്റുമാർ വഴിയും അജ്ഞാത ഫോൺ കോളുകൾ വഴിയും നേതാക്കളെ കുടുക്കാൻ ശ്രമങ്ങൾ നടക്കുന്നുണ്ടെന്നും അദ്ദേഹം ആരോപിച്ചു. മന്ത്രിമാരും മറ്റ് നേതാക്കളും ഇത്തരം നീക്കങ്ങൾക്കെതിരെ ജാഗ്രത പാലിക്കണമെന്നും അദ്ദേഹം ആവശ്യപ്പെട്ടു.
കർണാടക മുൻ മുഖ്യമന്ത്രി സിദ്ധരാമയ്യയുമായി ബന്ധപ്പെട്ട ഒളിക്യാമറ ദൃശ്യങ്ങളെച്ചൊല്ലി രാഷ്ട്രീയ തർക്കം തുടരുന്നതിനിടെയാണ് ശിവകുമാറിന്റെ പുതിയ വെളിപ്പെടുത്തൽ. ആരോപണങ്ങളിൽ സ്വതന്ത്രമായ സ്ഥിരീകരണമോ ബന്ധപ്പെട്ട വ്യവസായിയുടെ പ്രതികരണമോ പുറത്തുവന്നിട്ടില്ല.
