കൊച്ചി: മലയാളത്തിൽ ശ്രദ്ധേയമായ സിനിമകൾ ഒരുക്കിയ സംവിധായകൻ എം. പത്മകുമാർ ബോളിവുഡിലേക്ക്. സണ്ണി ഡിയോൾ നായകനാകുന്ന ‘സൂര്യ’യാണ് പത്മകുമാറിന്റെ ആദ്യ ഹിന്ദി ചിത്രം. സിനിമയുടെ ഫസ്റ്റ് ലുക്ക് സണ്ണി ഡിയോളിന്റെ ഔദ്യോഗിക സോഷ്യൽ മീഡിയ പേജിലൂടെ പുറത്തിറക്കി. നവംബർ 20ന് ചിത്രം ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തുമെന്നാണ് അണിയറപ്രവർത്തകർ അറിയിച്ചിരിക്കുന്നത്.
ജയ്പൂർ, ഉദയ്പൂർ, മുംബൈ എന്നിവിടങ്ങളിലായി ചിത്രീകരണം പൂർത്തിയാക്കിയ ചിത്രത്തിൽ പ്രമുഖ ബോളിവുഡ് താരങ്ങളും അണിനിരക്കുന്നുണ്ട്. പ്രഗ്യാ ജയ്‌സ്വാളും തനുശ്രീ ചക്രവർത്തിയുമാണ് നായികമാർ. രവി കിഷൻ, ടിനു ആനന്ദ്, മനീഷ് വാധ്വ, ജിഷു സെൻഗുപ്ത, രോഹിത് തിവാരി, ഖാലിദ് സിദ്ദിഖി, അനൂപ് ത്രിവേദി എന്നിവരും പ്രധാന വേഷങ്ങളിലെത്തുന്നു.
എം.എം. മൂവീസിന്റെ ബാനറിൽ കമൽ മുക്കൂട്ട് അവതരിപ്പിക്കുന്ന ചിത്രത്തിന്റെ ഛായാഗ്രഹണം പ്രശസ്ത ബോളിവുഡ് ഛായാഗ്രാഹകൻ സന്തോഷ് തുണ്ടിയിലാണ് നിർവഹിക്കുന്നത്. ബല്ലു സലൂജയാണ് എഡിറ്റിംഗ്. ഷാഹി കബീറിന്റെ കഥയ്ക്ക് കരൺ റസ്ദാൻ, നീരജ് പാഠക്, മായങ്ക് ശർമ എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്.
ഉത്തം സിംഗും രഞ്ജിൻ രാജും ചേർന്നാണ് ചിത്രത്തിലെ ഗാനങ്ങൾ ഒരുക്കുന്നത്. പശ്ചാത്തല സംഗീതവും ഉത്തം സിംഗിന്റേതാണ്. സണ്ണി ഡിയോളിന്റെ കരിയറിലെ ശ്രദ്ധേയമായ പ്രകടനങ്ങളിലൊന്നായിരിക്കും ‘സൂര്യ’യിലേതെന്ന് അണിയറപ്രവർത്തകർ അവകാശപ്പെടുന്നു.
മലയാള സിനിമയിൽ തന്റേതായ സംവിധാനശൈലിയിലൂടെ ശ്രദ്ധ നേടിയ എം. പത്മകുമാറിന്റെ ബോളിവുഡ് അരങ്ങേറ്റം സിനിമാപ്രേമികൾക്കിടയിൽ പ്രതീക്ഷയുണർത്തുകയാണ്. സണ്ണി ഡിയോളിന്റെ താരപ്രഭയും മലയാളത്തിൽ പരിചിതനായ സംവിധായകന്റെ സംവിധാനവും ഒന്നിക്കുന്ന ‘സൂര്യ’യുടെ റിലീസിനായി കാത്തിരിക്കുകയാണ് ആരാധകർ.
