ഒവീഡോ: സ്പെയിനിലെ പ്രശസ്തമായ പ്രിൻസസ് ഓഫ് അസ്റ്റൂറിയസ് പുരസ്കാരം സ്വന്തമാക്കി അർജന്റീനിയൻ ഫുട്ബോൾ ഇതിഹാസം ലയണൽ മെസി. ഈ ബഹുമതി നേടുന്ന ആദ്യ ഫുട്ബോൾ താരമെന്ന നേട്ടവും മെസി സ്വന്തമാക്കി. വടക്കൻ സ്പാനിഷ് നഗരമായ ഒവീഡോയിൽ വെള്ളിയാഴ്ച നടന്ന ചടങ്ങിൽ 2026ലെ പുരസ്കാരം മെസി ഏറ്റുവാങ്ങി. കാമ്പോമോർ തിയേറ്ററിൽ നടന്ന പ്രൗഢഗംഭീരമായ ചടങ്ങിൽ ലിയോണർ രാജകുമാരിയിൽനിന്നാണ് താരം പുരസ്കാരം സ്വീകരിച്ചത്. സ്പെയിൻ രാജാവ് ഫെലിപ്പ് ആറാമനും രാജ്ഞി ലെറ്റീസിയയും ചടങ്ങിൽ പങ്കെടുത്തു.
ഫുട്ബോൾ ലോകത്തെ അസാധാരണ നേട്ടങ്ങൾക്കൊപ്പം മെസിയുടെ ജീവകാരുണ്യ പ്രവർത്തനങ്ങളും പരിഗണിച്ചാണ് പുരസ്കാരത്തിന് തെരഞ്ഞെടുത്തത്. വിനയം, ടീം വർക്ക്, ഫെയർ പ്ലേ തുടങ്ങിയ ഗുണങ്ങളും പുരസ്കാര നിർണയത്തിൽ വിലയിരുത്തിയിരുന്നു. കളിക്കളത്തിലെ മികവിനൊപ്പം സമൂഹത്തോടുള്ള ഉത്തരവാദിത്തവും പരിഗണിക്കപ്പെടുന്ന അംഗീകാരമാണ് മെസിക്ക് ലഭിച്ചിരിക്കുന്നത്.
ജൂൺ മൂന്നിനായിരുന്നു പുരസ്കാരം പ്രഖ്യാപിച്ചത്. ഫുട്ബോൾ കരിയറിൽ നിരവധി വ്യക്തിഗത ബഹുമതികൾ സ്വന്തമാക്കിയിട്ടുള്ള മെസിക്ക് ഈ പുരസ്കാരം മറ്റൊരു ചരിത്രനേട്ടമായി. അതേസമയം, കായികരംഗത്തെ നിരവധി പ്രമുഖർക്ക് മുൻപ് പ്രിൻസസ് ഓഫ് അസ്റ്റൂറിയസ് പുരസ്കാരം ലഭിച്ചിട്ടുണ്ട്.
മെസിയുടെ മുൻ ബാഴ്‌സലോണ സഹതാരം സാവി ഹെർണാണ്ടസും സ്പാനിഷ് ഗോൾകീപ്പർ ഇക്കർ കാസില്ലസും 2012ൽ സംയുക്തമായി ഈ ബഹുമതി നേടിയിരുന്നു. 2002ൽ അഞ്ചാം ലോകകപ്പ് കിരീടം നേടിയ ബ്രസീൽ ദേശീയ ഫുട്ബോൾ ടീമിനും പുരസ്കാരം ലഭിച്ചിരുന്നു.
ഫുട്ബോൾ ലോകത്ത് തലമുറകളെ പ്രചോദിപ്പിച്ച താരമായ മെസിക്ക് ലഭിച്ച ഈ അംഗീകാരം അദ്ദേഹത്തിന്റെ കായിക നേട്ടങ്ങൾക്കൊപ്പം മാനുഷിക മൂല്യങ്ങൾക്കുമുള്ള ആദരവായാണ് വിലയിരുത്തപ്പെടുന്നത്.
