രണ്ട് ഐസിസി ഫുള്‍ മെമ്പര്‍ ടീമുകള്‍ തമ്മില്‍ നടന്ന 3 മത്സരങ്ങളുള്ള ട്വന്റി20 പരമ്പരയില്‍ ഏറ്റവും കൂടുതല്‍ റണ്‍സ് നേടുന്ന താരമെന്ന റെക്കോര്‍ഡ് പാകിസ്ഥാൻ നായകന്‍ സാഹിബ്‌സാദ ഫര്‍ഹാന്‍ സ്വന്തമാക്കി. റാവല്‍പിണ്ടിയില്‍ നടന്ന ശ്രീലങ്കയ്ക്കെതിരായ മൂന്നാമത്തെയും അവസാനത്തെയും ട്വന്റി20 മത്സരത്തില്‍ പാകിസ്താന്‍ 8 വിക്കറ്റിന് തോറ്റെങ്കിലും, പരമ്പരയിലുടനീളം 238 റണ്‍സ് അടിച്ചുകൂട്ടിയാണ് ഫര്‍ഹാന്‍ ഈ ചരിത്രനേട്ടം കൈവരിച്ചത്. പരമ്പരയിലെ തന്റെ തുടര്‍ച്ചയായ മൂന്നാം അര്‍ധസെഞ്ച്വറി (47 പന്തില്‍ 76 റണ്‍സ്) കുറിച്ചാണ് ഫര്‍ഹാന്‍ തന്റെ ആകെ റണ്‍സ് 238-ല്‍ എത്തിച്ചത്.
ഈ വര്‍ഷം ആദ്യം അഫ്ഗാനിസ്ഥാനെതിരെ 229 റണ്‍സ് നേടിയ ഇന്ത്യന്‍ താരം അഭിഷേക് ശര്‍മയുടെ റെക്കോര്‍ഡാണ് ഇതോടെ പഴങ്കഥയായത്. 2023-24 പരമ്പരയില്‍ വെസ്റ്റ് ഇന്‍ഡീസിനെതിരെ 223 റണ്‍സ് നേടിയ ന്യൂസിലന്‍ഡിന്റെ കോളിന്‍ മണ്‍റോയാണ് പട്ടികയില്‍ മൂന്നാം സ്ഥാനത്ത്. ഓസ്‌ട്രേലിയയുടെ ഡേവിഡ് വാര്‍ണര്‍ (2019-ല്‍ ശ്രീലങ്കയ്ക്കെതിരെ 217 റണ്‍സ്), അഫ്ഗാനിസ്ഥാന്റെ ഹസ്രത്തുള്ള സസായി (2019-ല്‍ അയര്‍ലന്‍ഡിനെതിരെ 204 റണ്‍സ്) എന്നിവരാണ് തുടര്‍ന്നുള്ള സ്ഥാനങ്ങളില്‍.
റാവല്‍പിണ്ടി ക്രിക്കറ്റ് സ്റ്റേഡിയത്തില്‍ നടന്ന അവസാന മത്സരത്തില്‍ പാകിസ്ഥാൻ ഉയര്‍ത്തിയ 168/8 എന്ന ലക്ഷ്യം 17 പന്തുകള്‍ ബാക്കിനില്‍ക്കെ ശ്രീലങ്ക മറികടന്നു. 47 പന്തില്‍ 87 റണ്‍സ് അടിച്ച് തിളങ്ങിയ കുശാല്‍ മെന്‍ഡിസാണ് ശ്രീലങ്കയുടെ വിജയം എളുപ്പമാക്കിയത്. മെന്‍ഡിസ് തന്നെയാണ് മത്സരത്തിലെ താരം. അവസാന മത്സരത്തില്‍ തോറ്റെങ്കിലും പരമ്പര ഫലം പാകിസ്താനെ ബാധിച്ചില്ല. ആദ്യ രണ്ട് മത്സരങ്ങളും ആധിപത്യത്തോടെ ജയിച്ച് പാകിസ്താന്‍ നേരത്തെ തന്നെ പരമ്പര സ്വന്തമാക്കിയിരുന്നു. ഒക്ടോബര്‍ 9-ന് നടന്ന ആദ്യ മത്സരത്തില്‍ 4 വിക്കറ്റിനും, ഒക്ടോബര്‍ 11-ന് നടന്ന രണ്ടാം മത്സരത്തില്‍ 82 റണ്‍സിനുമായിരുന്നു പാകിസ്താന്റെ ജയം. ഒക്ടോബര്‍ 13-നായിരുന്നു ശ്രീലങ്ക അവസാന പോരാട്ടം ജയിച്ചത്.
മത്സരശേഷം സംസാരിച്ച ഫര്‍ഹാന്‍, ആദ്യ രണ്ട് മത്സരങ്ങളിലെ അതേ തന്ത്രം തന്നെയാണ് അവസാന മത്സരത്തിലും പിന്തുടര്‍ന്നതെന്ന് പറഞ്ഞു. മികച്ച ഫോം നിലനിര്‍ത്താനും പരമാവധി പ്രയോജനപ്പെടുത്താനുമാണ് താന്‍ ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു. അതേസമയം, അവസാന മത്സരത്തിലെ എട്ട് വിക്കറ്റ് വിജയത്തില്‍ ടീമിന്റെ മികച്ച ബൗളിങ്ങിനെയും ഫീല്‍ഡിങ്ങിനെയും ബാറ്റിങ്ങിനെയും ശ്രീലങ്കന്‍ നായകന്‍ കുശാല്‍ മെന്‍ഡിസ് പ്രശംസിച്ചു. എല്ലാ മേഖലകളിലും ടീം മികച്ച പ്രകടനം പുറത്തെടുത്തതായി അദ്ദേഹം വ്യക്തമാക്കി.
