സംസ്ഥാനത്ത് സ്വർണ വിലയിൽ വൻ ഇടിവ്. 22 കാരറ്റ് സ്വർണം ഒരു പവന് 1,400 രൂപയുടെ കുറവോടെ 1,04,480 രൂപയിലും ഗ്രാമിന് 175 രൂപയുടെ ഇടിവോടെ 13,060 രൂപയിലുമാണ് ഇന്ന് വ്യാപാരം നടക്കുന്നത്. ഇതോടെ ഒക്ടോബർ മാസത്തിലെ ഏറ്റവും താഴ്ന്ന നിലയിലേക്ക് എത്തിയിരിക്കുകയാണ് വില. കഴിഞ്ഞ പത്താം തിയതിയാണ് ഒക്ടോബർ മാസത്തിലെ ഏറ്റവും ഉയർന്ന നിലയായ 1,11,040 രൂപ എന്ന ലെവൽ സ്വർണ വില രേഖപ്പെടുത്തിയത്. അവിടെ നിന്നും ഏകദേശം 14 ദിവസം കൊണ്ട് 6,560 രൂപയുടെ ഇടിവാണ് ഉണ്ടായിരിക്കുന്നത്.രാജ്യാന്തര തലത്തിലെ സ്വർണ വിലയിലുണ്ടായ ഇടിവാണ് ആഭ്യന്തര വിപണിയിലും പ്രതിഫലിച്ചത്.
രാജ്യാന്തര തലത്തിൽ ട്രോയ് ഔൺസിന് 4,000 ഡോളർ നിലവാരത്തിലാണ് നിലവിൽ വ്യാപാരം പുരോഗമിക്കുന്നത്. അമേരിക്കൻ കേന്ദ്രബാങ്കായ ഫെഡറൽ റിസർവ് പണപ്പെരുപ്പം നിയന്ത്രിക്കുന്നതിനായി പലിശനിരക്ക് ഉയർത്തിയേക്കുമെന്ന പ്രതീക്ഷ ശക്തമായതോടെ ആഗോള വിപണിയിൽ സ്വർണവില ഇടിയുകയാണ്.പലിശനിരക്ക് ഉയരുന്നത് സ്വർണത്തേക്കാൾ മികച്ച വരുമാനം നൽകുന്ന ബോണ്ടുകൾ പോലുള്ള നിക്ഷേപങ്ങളിലേക്ക് നിക്ഷേപകരെ ആകർഷിക്കുന്നു. ഇതോടൊപ്പം യുഎസ് ഡോളർ ശക്തിപ്പെടുന്നതും ലാഭമെടുപ്പിന്റെ ഭാഗമായി നിക്ഷേപകർ സ്വർണം വിറ്റഴിക്കുന്നതും വിലയിടിവിന് ആക്കം കൂട്ടുന്നുണ്ട്.
ആഗോള സാമ്പത്തിക സാഹചര്യങ്ങളിലെ മാറ്റങ്ങളും നിക്ഷേപകരുടെ ജാഗ്രതയും സ്വർണവിപണിയിൽ സമ്മർദം സൃഷ്ടിക്കുന്നുണ്ട്.
എന്നാൽ കേന്ദ്രബാങ്കുകളുടെ സ്വർണവാങ്ങൽ, ആഗോള സാമ്പത്തിക അനിശ്ചിതത്വം, ദീർഘകാല നിക്ഷേപ ആവശ്യം എന്നിവ സ്വർണവിലയ്ക്ക് പിന്തുണ നൽകുന്ന ഘടകങ്ങളായി തുടരുന്നതിനാൽ നിലവിലെ ഇടിവ് ദീർഘകാല മുന്നേറ്റത്തിന്റെ അവസാനമാണെന്ന് ഉറപ്പിച്ച് പറയാനാകില്ല.സ്വർണ വില കേരളത്തിൽ സർവകാല ഉയരം തൊട്ടത് ജനുവരിയിൽ ആയിരുന്നു. അന്ന് പവന് 1,31,160 രൂപയും ഗ്രാമിന് 16,395 രൂപയുമുമായിരുന്നു നിരക്ക്.
