ദോഫാറിലെ കർഷകർക്ക് ആശ്വാസം: താത്കാലിക തൊഴിലാളി കൈമാറ്റത്തിന് നിബന്ധനകളോടെ അംഗീകാരം

മസ്കത്ത്: ഒമാനിലെ ദോഫാർ ഗവർണറേറ്റിലെ നജ്ദ് മേഖലയിലുള്ള കർഷകർക്ക് ആശ്വാസമായി പുതിയ തീരുമാനം. വിളവിറക്കുന്നതിനും വിളവെടുക്കുന്നതിനും ആവശ്യമായ തൊഴിലാളികളുടെ കുറവ് പരിഹരിക്കുന്നതിനായി താത്കാലിക കാർഷിക തൊഴിലാളി കൈമാറ്റ പദ്ധതിക്ക് തൊഴിൽ മന്ത്രാലയം അനുമതി നൽകി. കാർഷിക, ഫിഷറീസ്, ജലവിഭവ മന്ത്രാലയവുമായി സഹകരിച്ച് ദോഫാറിലെ ലേബർ ഡയറക്ടറേറ്റ് ജനറൽ വഴിയാണ് പദ്ധതി നടപ്പാക്കുന്നത്. പുതിയ നിയമപ്രകാരം കർഷകർക്ക് വിളവിറക്കുന്ന സീസണിൽ ഒരു മാസത്തേക്കും, വിളവെടുപ്പ് സീസണിൽ പരമാവധി രണ്ട് മാസത്തേക്കും തൊഴിലാളികളെ താൽക്കാലികമായി മറ്റ് ഫാമുകളിലേക്ക് മാറ്റാൻ അനുവാദമുണ്ടാകും.