കുവൈത്തിൽ ട്രാൻസിറ്റ് വിമാന സർവീസുകൾ ആരംഭിക്കുമെന്ന് പ്രചാരണം; നിഷേധിച്ച് വ്യോമയാന അതോറിറ്റി

കുവൈത്ത് സിറ്റി: ഒക്ടോബർ ഒന്നുമുതൽ കുവൈത്ത് അന്താരാഷ്ട്ര വിമാനത്താവളം വഴി ട്രാൻസിറ്റ് വിമാന സർവീസുകൾ ആരംഭിക്കുമെന്ന പ്രചാരണം നിഷേധിച്ച് കുവൈത്ത് പബ്ലിക് അതോറിറ്റി ഓഫ് സിവിൽ ഏവിയേഷൻ. കുവൈത്ത് വിമാനത്താവളത്തിൽ സർവീസ് നടത്തുന്ന ഒരു വിമാനക്കമ്പനി ഒക്ടോബർ ഒന്നുമുതൽ ട്രാൻസിറ്റ് സർവീസുകൾ ആരംഭിക്കുമെന്ന് പ്രഖ്യാപിച്ചതായുള്ള റിപ്പോർട്ടുകൾ തെറ്റാണെന്ന് അതോറിറ്റി ഔദ്യോഗിക വക്താവ് അബ്ദുല്ല അൽ റാജ്ഹി വ്യക്തമാക്കി.

ട്രാൻസിറ്റ് സർവീസുകൾ പുനരാരംഭിക്കുന്നതുമായി ബന്ധപ്പെട്ട് വിമാനക്കമ്പനികൾക്ക് യാതൊരു ഔദ്യോഗിക തീരുമാനമോ അറിയിപ്പോ നൽകിയിട്ടില്ലെന്നും അദ്ദേഹം അറിയിച്ചു. വിമാന സർവീസുകളുമായി ബന്ധപ്പെട്ട പ്രഖ്യാപനങ്ങൾ നടത്തുന്നതിന് മുമ്പ് ബന്ധപ്പെട്ട അധികൃതരിൽനിന്ന് വിവരങ്ങൾ സ്ഥിരീകരിക്കണമെന്ന് എല്ലാ വിമാനക്കമ്പനികളോടും അതോറിറ്റി ആവശ്യപ്പെട്ടു.

തെറ്റായ പ്രഖ്യാപനങ്ങൾ യാത്രക്കാർക്കിടയിൽ ആശയക്കുഴപ്പം സൃഷ്ടിക്കുമെന്നും ഇത്തരം നടപടികൾ അംഗീകരിക്കാനാവില്ലെന്നും അധികൃതർ വ്യക്തമാക്കി. ട്രാൻസിറ്റ് വിമാന സർവീസുകൾ പുനരാരംഭിക്കുന്നതുമായി ബന്ധപ്പെട്ട ഏതൊരു തീരുമാനവും സിവിൽ ഏവിയേഷൻ അതോറിറ്റിയുടെ ഔദ്യോഗിക ചാനലുകളിലൂടെ അറിയിക്കുമെന്നും അധികൃതർ അറിയിച്ചു.

Leave a Reply

Your email address will not be published. Required fields are marked *