തിരുവനന്തപുരം: സംസ്ഥാനത്ത് വളർത്തുനായകളുടെ പരിപാലനം, പ്രജനനം, ഉപേക്ഷിക്കൽ എന്നിവ നിയന്ത്രിക്കുന്നതിനായി കർശന നിയമങ്ങളുമായി സർക്കാർ. ഒരു വീട്ടിൽ പരമാവധി മൂന്ന് വളർത്തുനായകളെ മാത്രമേ അനുവദിക്കൂ എന്നതടക്കമുള്ള വ്യവസ്ഥകളാണ് പരിഗണനയിലുള്ളത്. വളർത്തുനായകൾക്ക് നിർബന്ധിത രജിസ്‌ട്രേഷൻ ഏർപ്പെടുത്തുന്നതുൾപ്പെടെയുള്ള പുതിയ നിയമങ്ങൾ ഉടൻ നടപ്പാക്കുമെന്ന് തദ്ദേശസ്വയംഭരണ വകുപ്പ് മന്ത്രി കെ.എം. ഷാജി ദ ന്യൂ ഇന്ത്യൻ എക്സ്പ്രസിനോട് പറഞ്ഞു.
അനിയന്ത്രിതമായ പ്രജനനം തടയുകയും ഉത്തരവാദിത്തമുള്ള വളർത്തുമൃഗ പരിപാലനം ഉറപ്പാക്കുകയും ചെയ്യുകയാണ് പുതിയ നിയന്ത്രണങ്ങളുടെ ലക്ഷ്യം. നിലവിൽ സംസ്ഥാനത്തെ വളർത്തുനായകളുടെ എണ്ണം തെരുവുനായകളുടെ എണ്ണത്തിന്റെ ഇരട്ടിയിലധികമാണെന്നാണ് കണക്കാക്കുന്നത്. എന്നാൽ സമഗ്രമായ രജിസ്‌ട്രേഷൻ സംവിധാനം ഇല്ലാത്തതിനാൽ കൃത്യമായ കണക്കുകൾ ലഭ്യമല്ല. രജിസ്‌ട്രേഷൻ നടപ്പാക്കുന്നതോടെ വളർത്തുനായകളുടെ എണ്ണം സംബന്ധിച്ച വ്യക്തമായ വിവരങ്ങൾ ശേഖരിക്കാനും നിയന്ത്രണങ്ങൾ കാര്യക്ഷമമാക്കാനും കഴിയുമെന്ന് മന്ത്രി വ്യക്തമാക്കി.
പുതിയ വ്യവസ്ഥകൾ നിലവിൽ വരുന്നതോടെ രജിസ്‌ട്രേഷൻ ഇല്ലാതെ വളർത്തുനായകളെ സംരക്ഷിക്കുന്നത് കുറ്റകരമാകും. അനധികൃത പ്രജനനം നടത്തുന്നവർക്കും ഒരു വീട്ടിൽ അനുവദനീയമായ വളർത്തുമൃഗങ്ങളുടെ എണ്ണപരിധി ലംഘിക്കുന്നവർക്കുമെതിരെ നടപടിയെടുക്കാനും സർക്കാർ ആലോചിക്കുന്നുണ്ട്. വളർത്തുമൃഗങ്ങളെ ഉപേക്ഷിക്കുന്നവർക്ക് 10,000 രൂപ പിഴ ചുമത്താനുള്ള വ്യവസ്ഥയും പരിഗണനയിലുണ്ട്.
നായകളുടെ പ്രജനനത്തിന് പ്രത്യേക ലൈസൻസ് ഏർപ്പെടുത്താനും തദ്ദേശസ്വയംഭരണ വകുപ്പ് ഒരുങ്ങുകയാണ്. ദത്തെടുക്കുന്ന നായകൾ ഉൾപ്പെടെ എല്ലാ വളർത്തുനായകൾക്കും വന്ധ്യംകരണം നിർബന്ധമാക്കാനാണ് നീക്കമെന്ന് വകുപ്പ് ഉദ്യോഗസ്ഥൻ അറിയിച്ചു. പുതിയ നിയമങ്ങളും നടപടിക്രമങ്ങളും വിശദീകരിക്കുന്ന കൈപ്പുസ്തകം ഈ ആഴ്ച പുറത്തിറക്കുമെന്നും മന്ത്രി അറിയിച്ചിട്ടുണ്ട്.
തെരുവുനായകളെ ദത്തെടുക്കുന്നത് പ്രോത്സാഹിപ്പിക്കുന്നതും പുതിയ നയത്തിന്റെ ഭാഗമാണ്. ഇതിലൂടെ ഷെൽട്ടറുകളെ ആശ്രയിക്കുന്നത് കുറയ്ക്കാനും നായകളുടെ സംരക്ഷണത്തിനുള്ള ചെലവ് ലാഭിക്കാനും കഴിയുമെന്നാണ് സർക്കാരിന്റെ പ്രതീക്ഷ. പെറ്റ് ഷോപ്പുകൾക്കും പുതിയ നിയന്ത്രണങ്ങൾ ബാധകമാകും. തദ്ദേശസ്ഥാപനങ്ങൾ ട്രേഡ് ലൈസൻസ് അനുവദിക്കുന്നതിന് മുമ്പ് അനിമൽ വെൽഫെയർ ബോർഡിന്റെ രജിസ്‌ട്രേഷൻ നിർബന്ധമാക്കാനും വ്യവസ്ഥയുണ്ട്.
രജിസ്‌ട്രേഷനും ചട്ടങ്ങൾ പാലിക്കുന്നതും മൃഗസംരക്ഷണ വകുപ്പിന്റെ ചുമതലയിലായിരിക്കും. ട്രേഡ് ലൈസൻസിങ്ങും നിയമനടപടികളും തദ്ദേശസ്ഥാപനങ്ങൾ കൈകാര്യം ചെയ്യും. തെരുവുനായ ആക്രമണങ്ങളിൽ ഇരയായവർക്ക് നഷ്ടപരിഹാരം നൽകുന്നതിനായി സംസ്ഥാനത്തെ 14 ജില്ലകളിലും സമിതികൾ പ്രവർത്തിക്കുന്നുണ്ട്. ഇതുവരെ 708 അപേക്ഷകൾ ലഭിച്ചിട്ടുണ്ടെന്നും അവ പരിശോധിച്ചുവരികയാണെന്നും അധികൃതർ അറിയിച്ചു.
