ബെൽഫാസ്റ്റ്: ഇന്ത്യയും അയർലൻഡും തമ്മിലുള്ള ആദ്യ ടി20 മത്സരത്തിന് വേദിയാകുന്ന ബെൽഫാസ്റ്റിൽ മഴ ഭീഷണി. ഇന്ന് ആറ് മണിക്ക് ആരംഭിക്കുന്ന മത്സരത്തിൽ ഇടവിട്ടുള്ള മഴയ്ക്ക് സാധ്യതയുണ്ടെന്നാണ് കാലാവസ്ഥാ പ്രവചനം. ടീമിലെ യുവതാരം വൈഭവ് സൂര്യവംശി തന്റെ കന്നി അന്താരാഷ്ട്ര മത്സരത്തിൽ അരങ്ങേറുമോ എന്നതാണ് ആരാധകർ ഉറ്റുനോക്കുന്ന പ്രധാന കാര്യം. എന്നാൽ, മഴ കളിക്ക് തടസ്സമാകുമോ എന്ന ആശങ്കയും നിലനിൽക്കുന്നുണ്ട്. ബിബിസി കാലാവസ്ഥാ പ്രവചനം അനുസരിച്ച്, വെള്ളിയാഴ്ച പകലും വൈകുന്നേരവും മഴയ്ക്കും മേഘാവൃതമായ അന്തരീക്ഷത്തിനും സാധ്യതയുണ്ട്. മത്സരസമയത്ത് 30 മുതൽ 43 ശതമാനം വരെ മഴയ്ക്ക് സാധ്യതയുണ്ടെന്നും, താപനില 22 മുതൽ 23 ഡിഗ്രി സെൽഷ്യസ് വരെയായിരിക്കുമെന്നും റിപ്പോർട്ടുകളുണ്ട്. തുടർച്ചയായ കനത്ത മഴയല്ല പ്രവചിക്കപ്പെട്ടിരിക്കുന്നത് എന്നതിനാൽ മത്സരം പൂർണ്ണമായും തടസ്സപ്പെടില്ലെന്നാണ് പ്രതീക്ഷ. ഇടയ്ക്കിടെയുള്ള ചെറിയ മഴ മാറിനിൽക്കുന്ന അവസരങ്ങളിൽ കളി നടക്കുമെന്നും, ചിലപ്പോൾ മഴ തടസ്സപ്പെടുത്തിയേക്കാമെന്നും റിപ്പോർട്ടുകൾ സൂചിപ്പിക്കുന്നു.
ഇന്ത്യ-അയർലൻഡ് ടി20: വൈഭവ് സൂര്യവംശിയുടെ അരങ്ങേറ്റം മഴയെടുക്കുമോ?
