ദുബൈ: ദുബൈ നഗരത്തിലെ ഏറ്റവും തിരക്കേറിയ മെട്രോ സ്റ്റേഷൻ ‘ബുർജുമാൻ’ ആണെന്ന് ദുബൈ റോഡ് ട്രാൻസ്പോർട്ട് അതോറിറ്റിയുടെ കണക്കുകൾ. കഴിഞ്ഞ ആറുമാസത്തിനിടെ 84 ലക്ഷം പേരാണ് ഈ സ്റ്റേഷനിലൂടെ യാത്ര ചെയ്തത്. യൂണിയൻ സ്റ്റേഷനാണ് തിരക്കേറിയ രണ്ടാമത്തെ സ്റ്റേഷൻ.
തിരക്കിന്റെ കാര്യത്തിൽ മുന്നിലുള്ള രണ്ട് സ്റ്റേഷനുകളും ഇന്റർചേഞ്ച് സ്റ്റേഷനുകളാണ്. തിരക്കേറിയ രണ്ടാമത്തെ സ്റ്റേഷനായ യൂണിയൻ സ്റ്റേഷനിലൂടെ കഴിഞ്ഞ ആറുമാസം കടന്നുപോയത് 65 ലക്ഷം പേരാണ്. റെഡ്, ഗ്രീൻ ലൈനുകളിൽക്കിടയിൽ ട്രെയിൻ മാറിക്കയറാൻ ഉപയോഗിക്കുന്നവയാണ് ഇന്റർചേഞ്ച് സ്റ്റേഷനുകൾ.
റെഡ് ലൈനിൽ ഏറ്റവും തിരക്കേറിയത് റിഗ്ഗ സ്റ്റേഷനാണ്. 64 ലക്ഷം പേരാണ് ഇതിലൂടെ യാത്ര ചെയ്തത്. മാൾ ഓഫ് ദി എമിറേറ്റ്സ് സ്റ്റേഷനാണ് റെഡ്ലൈനിലെ രണ്ടാം സ്ഥാനത്തുള്ളത്. 52 ലക്ഷം പേരാണ് ഈ സ്റ്റേഷൻ യാത്രക്കായി ഉപയോഗിച്ചത്. മൂന്നാം സ്ഥാനത്തുള്ള ബിസിനസ് ബേ സ്റ്റേഷനിലൂടെ കടന്നുപോയത് 50 ലക്ഷം യാത്രക്കാരാണെന്ന് ആർ.ടി.എയുടെ കണക്കുകൾ പറയുന്നു.ഗ്രീൻലൈനിൽ ഷറഫ് ഡി.ജി. സ്റ്റേഷനാണ് ഒന്നാം സ്ഥാനത്ത്. 49 ലക്ഷം യാത്രക്കാർ ഈ സ്റ്റേഷനിലൂടെ യാത്ര ചെയ്തു. ബനിയാസ് സ്ക്വയർ സ്റ്റേഷനാണ് ഗ്രീൻ ലൈനിൽ രണ്ടാം സ്ഥാനത്തുള്ളത്. 38 ലക്ഷം യാത്രക്കാർ ഈ സ്റ്റേഷൻ ഉപയോഗിച്ചു. 37 ലക്ഷം യാത്രക്കാർ കടന്നുപോയ സ്റ്റേഡിയം മെട്രോ സ്റ്റേഷനാണ് ഗ്രീൻ ലൈനിൽ മൂന്നാം സ്ഥാനത്തുള്ളത്.
