സി ജെ പി പ്രൊട്ടസ്ററ്: ‘ചരിത്രം തിരുത്തും’; മുംബൈയിൽ വൻ പ്രതിഷേധം, കനത്ത സുരക്ഷ

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കോക്ക്റോച്ച് ജനതാ പാർട്ടി (CJP) മുംബൈയിൽ പ്രതിഷേധം സംഘടിപ്പിച്ചു. ഗാന്ധിജയന്തി ദിനത്തിൽ ശിവാജി പാർക്കിന് സമീപമാണ് പ്രതിഷേധം പ്രഖ്യാപിച്ചിരുന്നത്.

തിരഞ്ഞെടുപ്പ് കമ്മിഷന്റെ പ്രവർത്തനത്തിലും വോട്ടർപട്ടികയിലെ പ്രത്യേക തീവ്ര പുതുക്കൽ (SIR) നടപടികളിലും സുതാര്യത വേണമെന്നാണ് സി ജെ പി യുടെ പ്രധാന ആവശ്യങ്ങൾ. SIR നടപടികൾ മരവിപ്പിക്കണമെന്നും 2025ലെ വോട്ടർപട്ടിക ഉപയോഗിക്കണമെന്നും സംഘടന ആവശ്യപ്പെട്ടിട്ടുണ്ട്.

പ്രതിഷേധത്തിന് മുംബൈ പൊലീസ് അനുമതി നിഷേധിച്ചിരുന്നെങ്കിലും സി ജെ പി സമരവുമായി മുന്നോട്ടുപോകുകയായിരുന്നു. ശിവാജി പാർക്കിലേക്കുള്ള പ്രധാന വഴികളിലും ദാദർ റെയിൽവേ സ്റ്റേഷനിലും പൊലീസ് സുരക്ഷ ശക്തമാക്കി ബാരിക്കേഡുകൾ സ്ഥാപിച്ചു.

നടൻ നസറുദ്ദീൻ ഷായും പ്രതിഷേധത്തിന് പിന്തുണയുമായി മുംബൈയിലെത്തിയതായി റിപ്പോർട്ടുണ്ട്. സംഗീത സംവിധായകൻ വിശാൽ ദദ്‌ലാനിയും സമരത്തിൽ പങ്കെടുക്കുമെന്ന് നേരത്തെ അറിയിച്ചിരുന്നു.

മുംബൈയിൽ ആരംഭിച്ച പ്രതിഷേധം രാജ്യത്തെ വിവിധ നഗരങ്ങളിലേക്ക് വ്യാപിപ്പിക്കുമെന്നും തുടർന്ന് ഡൽഹിയിലെ ജന്തർ മന്തറിൽ സമരം നടത്തുമെന്നും സി ജെ പി നേതൃത്വം പ്രഖ്യാപിച്ചിട്ടുണ്ട്.

Leave a Reply

Your email address will not be published. Required fields are marked *