അജ്മീർ: അജ്മീറിൽ വൻ കള്ളനോട്ട് വേട്ട. പൊലീസ് നടത്തിയ പരിശോധനയിൽ 13.06 ലക്ഷം രൂപയുടെ വ്യാജ കറൻസിയുമായി ഒരാൾ പിടിയിലായി. 500 രൂപയുടെ നോട്ടുകളാണ് ഇയാളിൽ നിന്ന് പിടിച്ചെടുത്തത്. സംഭവത്തിൽ വിശദമായ അന്വേഷണം ആരംഭിച്ചതായി പൊലീസ് അറിയിച്ചു. സംസ്ഥാനത്ത് സമീപകാലത്തുണ്ടായ വലിയ കള്ളനോട്ട് വേട്ടകളിലൊന്നാണിത്. പിടിയിലായ ആൾ ഏത് സംഘത്തിന്റെ ഭാഗമാണെന്നും നോട്ടിന്റെ ഉറവിടം എവിടെയാണെന്നും കണ്ടെത്താനുള്ള ശ്രമത്തിലാണ് പൊലീസ്.
അജ്മീറിലെ സംഭവത്തിന് പിന്നാലെ അസമിലെ ഗുവാഹത്തിയിലും സമാനമായ രീതിയിൽ കള്ളനോട്ട് പിടികൂടി. ഇവിടെ 13.5 ലക്ഷം രൂപയുടെ വ്യാജ കറൻസികളാണ് പോലീസ് കണ്ടെടുത്തത്. സംഭവവുമായി ബന്ധപ്പെട്ട് അഞ്ചംഗ സംഘത്തെ അറസ്റ്റ് ചെയ്തിട്ടുണ്ട്. ഗുവാഹത്തിയിൽ പിടിയിലായ സംഘത്തിന് പിന്നിൽ വലിയൊരു ശൃംഖലയുണ്ടോയെന്ന് പൊലീസ് സംശയിക്കുന്നുണ്ട്. രാജ്യത്തിന്റെ വിവിധ ഭാഗങ്ങളിൽ കള്ളനോട്ട് സംഘങ്ങൾ വീണ്ടും സജീവമാകുന്നതിന്റെ സൂചനയാണ് ഒരേ സമയം നടക്കുന്ന ഈ അറസ്റ്റുകൾ നൽകുന്നത്. രണ്ട് സംഭവങ്ങളിലും കൂടുതൽ വിവരങ്ങൾ പോലീസ് പുറത്തുവിട്ടിട്ടില്ല.
